هاتووچۆی چەمچەماڵ: 651 ئۆتۆمبێل لە لافاوەکەی چەمچەماڵ زیانیان بەرکەوتووە

ئاڤا نیوز

 

بەڕێوەبەرایەتیی هاتووچۆی چەمچەماڵ دەڵێت، 651 ئۆتۆمبێل بەهۆی لافاو زیانیان بەرکەوتووە و لیژنەیەکیش بۆ قەرەبووکردنەوەی خاوەنەکانیان پێکهێنراوە.

 

وێنە گەورەکە: بەهۆی لافاوە بەهێزەکەی چەمچەماڵ، تەکیە و شۆڕش ژمارەیەکی زۆر ئۆتۆمبێل زیانیان بەرکەوتووە، دوای ڕووداوەکە لیژنەیەکی تایبەتمەند بۆ خەمڵاندنی زیانەکانی ئۆتۆمبێلەکان دروستکرا و بانگەواز کرا بۆ ئەو کەسانەی ئۆتۆمبێلەکانیان زیانیان بەرکەوتووە بۆ ئەوەی زانیارییەکان لەڕێگەی فۆرمێکەوە بدەنە لیژنەی تایبەتمەند، ئێستا هاتووچۆی چەمچەماڵ ناوی تەواوی ئەو ئۆتۆمبێلانەی تۆمار کردووە کە زیانیان بەرکەوتووە و بڕیارە قەرەبوو بکرێنەوە.

 

لێدوانی فەرمی: عومەر عەلی، بەڕێوەبەری هاتووچۆی چەمچەماڵ، بە ئاڤای ڕاگەیاند، لیژنەیەکی تایبەت بۆ قەرەبووکردنەوەی زیانلێکەوتووانی ئۆتۆمبێڵەکان پێکهێنرا، بانگەوازێکمان ڕاگەیاند لە ماوەی سێ ڕۆژ ئەو کەسانەی ئۆتۆمبێلیان زیانی بەرکەوتبوو سەردانیان کردین و فۆڕمێکیان پێدرا کە تەواوی زانیاریی ئۆتۆمبێڵەکە و ئەو زیانەی بەرکەوتووە نووسراوە.

 

- لەبارەی ژمارەی ئەو ئۆتۆمبێلانەی زیانیان بەرکەوتووە، بەپێی دوایین ئامار ژمارەیان 651 ئۆتۆمبێلە.

 

زانیاریی زیاتر: ئۆتۆمبێل هەیە زیانەکانى زیاتر لە 20 ملیۆن دینارە و ئۆتۆمبێلیشی تێدایە نرخەکەى سێ ملیۆن دینارە یان کەمترە، بەپێی جۆری ئۆتۆمبێلەکە خاوەنەکەی قەرەبوو دەکرێتەوە، بەڵام شێوازی قەرەبووکردنەوەکەی جارێ دیار نییە، ئایا لە %100 قەرەبوو دەکرێنەوە یان بە ڕێژەیەکی دیاریکراو، دیاریکردنی کاتی قەرەبووکردنەوەکە دیاری نەکراوە.

 

ئەمەش بزانە: دوای لافاوەکەی چەمچەماڵ و دەورووبەری ئاڤا هەڵمەتی هاوکاریی لێقەوماوانی دەستپێکرد، بەو هۆیەوە زیاتر لە دوو ملیار دینار و 45 بارهەڵگری پڕ لە کەلوپەل و شتومەک لەلایەن بازرگان و هاووڵاتیانەوە لە ڕێگەی ئاڤاوە کۆکرایەوە و نێردرا بۆ لێقەوماوانی چەمچەماڵ، تەکییە و شۆڕش.