ترەمپ دەیەوێت خولی سێیەم وەربگرێت و دەستوور ڕێگا نادات

ئاڤا نیوز

لەکاتێکدا بەگوێرەی دەستووری ئەمریکا ڕێگریکراوە کەسێک بۆ زیاتر لە دووجار پۆستی سەرۆکی ئەمریکا وەربگرێت، ترەمپ خوازیارە خولی سێیەم بەدەستبهێنێت بۆ ئەم پرسە تاوتوێی ڕەشنووسی کتێبێک دەکات کە ئایا لەڕووی دەستوورییەوە ڕێکارەکان چۆنن.

بڵاوکراوەی فەرمی: ڕۆژنامەی وۆڵ ستریت جۆرناڵ بڵاویکردەوە، دۆناڵد ترەمپ سەرۆکی ئەمریکا تاوتوێی ڕەشنووسی کۆپییەکی کتێبێکی پارێزەر ئالان دێرشۆڤیتزی کردووە کە تیایدا  تاوتوێی ئەوە دەکات کە ئایا ترەمپ دەتوانێت لەڕووی دەستوورییەوە بۆ خولی سێیەمی وەک سەرۆک هەڵبژێردرێت.

زانیاریی بەدەستهاتوو: دێرشۆڤیتزـی پارێزەر بە ڕۆژنامەکەی وتووە پەیوەست بەم پرسە لەگەڵ ترەمپ قسەی کردوو و پێی وتووە،هێشتان دەستوور ڕوون نییە.

ئەوەی لەبارەیەوە دەگوترێت: ڕەشنووسی کتێبەکەی دێرشۆڤیتز بڕیارە ساڵی داهاتوو بڵاوبکرێتەوە بە ناوی "ئایا ترەمپ دەتوانێت لە ڕووی دەستوورییەوە خولی سێیەم بکات؟ دێرشۆڤیتز وتی کتێبەکە کۆمەڵێک سیناریۆ دەخاتەڕوو کە ئایا تاکێک دەتوانێت خولی سێیەم وەربگرێت''.

زانیاریی زیاتر: ترەمپ وتوویەتی کە کتێبەکە دەخوێنێتەوە، بەڵام دێرشۆڤیتز پێی وتووە کە دەستووری ئەمریکا ڕێگری دەکات لەوەی هەرکەسێک زیاتر لە دووجار هەڵبژێردرێت بۆیە سێیەم خولی سەرۆکایەتیی ڕوون نییە کە ئایا ڕێگەپێدراوە یان نا.

ئەوەی پێویستە بیزانیت: لە هەمواری بیست و دووەمی دەستووری ئەمریکادا لە بەشێکدا هاتووە کە "نابێت هیچ کەسێک لە دووجار زیاتر بۆ پۆستی سەرۆک هەڵببژێردرێت''.