ئاڤای خەڵک؛ دانیشتووانی گوندەکانی بناری چیای ئاسۆس داوای چاککردنەوەی پرد و ڕێڕەوەکان دەکەن

ئاڤا نیوز

 
بەهۆی تێکچوونی پرد و ڕێڕەوەکان، دانیشتوانی 14 گوندی بناری چیای ئاسۆس لە ناحیەی بنگرد داوای چاککردنەوەی پرد و ڕێڕەوەکان دەکەن.

بەدواداچوونی ئاڤا؛ لە ڕێگاکانی گوندەکانی بناری چیای ئاسۆس، سێ پردی ئاسنینی کاتی هەن، لافاو و بارانی چەند ڕۆژی ڕابردوو پردەکانی ڕووخاندووە، تەنیا یەکێکیان چاککراوەتەوە، ئاستەنگییەکی زۆری بۆ هاتووچۆی دانیشتوانی ئەو گوندانە دروستکردووە، کاک ئەبوبەکر دانیشتووی ئەو گوندەیە بە ئاڤای وت: "بێزاربووین هێندە داوای پردی پەڕینەوە بکەین، رێگاکە خراپ بووە و بە بەلەم و تەلەفریک هاتووچۆ دەکەین".

لێدوانی فەرمی: ئومێد حەمە ئەحمەد، بەڕێوەبەری چاککردنەوە و پاراستنی ڕێگاوبانی ڕاپەڕین، لەبارەی کێشەی ئەو گوندانە بە ئاڤای ڕاگەیاند، ڕۆژی سێشەممەی ڕابردوو لیژنەیەک سەردانی ناوچەکەیان کردووە، کۆمپانیایەک دەستی بە دیزاین کردووە، دوای تەواوبوونی دیزاینەکەی دەرخستەی بۆ دەکرێت و بەرز دەکرێتەوە بۆ ئەنجوومەنی وەزیران تاوەکو ڕەزامەندی دروستکردنی وەربگیرێت و دەستپێبکرێت. 

زانیاریی زیاتر: دانیشتووانی گوندی کێلە سپیانە، یەکێکە لە گوندەکانی ناوچەکە، ئێستا بۆ پەڕینەوە تەلەفریکێک بەکاردەهێنن و هەر خۆیاشیان دروستیان کردووە.