ڤیزای لۆتەریی ئەمریکا ڕادەگیرێت

ئاڤا نیوز

بە فەرمانی دۆناڵد ترەمپ، سەرۆکی ئەمریکا، کریستی نۆم، وەزیری ئاسایشی ناوخۆ، بڕیاری ڕاگرتنی پڕۆگرامی لۆتەریی ڤیزای جۆراوجۆر، ناسراو بە "گرین کارد"ی دەرکرد. 

چیرۆکی سەرەکی: بڕیارەکە دوای ئەوە دێت کە دەرکەوت گومانلێکراوی هێرشە چەکدارییەکانی زانکۆی بڕاون و پەیمانگای  تەکنۆلۆژیی ماساشوستس MIT  و لە ڕێگەی ئەم پڕۆگرامەوە چۆتە ئەمریکا.

ئەوەی پێویستە بیزانیت: کلاودیۆ نێڤێس ڤالێنتی، هاووڵاتییەکی پورتوگالییە و تۆمەتبار بوو بە کوشتنی سێ کەس و بریندارکردنی نۆ کەسی دیکە، رۆژی پێنجشەممە، 18-12-2025، بە مردوویی دۆزرایەوە. ناوبراو ساڵی 2017 لە ڕێگەی تیروپشکی گرین کاردەوە مافی نیشتەجێبوونی لە ئەمریکا وەرگرتبوو.

لێدوانی فەرمی: کریستی نۆم لە پلاتفۆرمی ئێکس رایگەیاند: "نەدەبوو هەرگیز ڕێگە بەم کەسە بدرێت بێتە ناو وڵاتەکەمانەوە."

ئەمەش بزانە: ساڵانە لە رێگەی ئەم تیروپشکەوە نزیکەی 50 هەزار ڤیزا دەدرێتە ئەو وڵاتانەی ڕێژەی کۆچبەریان لە ئەمریکا کەمە، کە زۆربەیان وڵاتانی ئەفریقان. بۆ ساڵی 2025 نزیکەی 20 ملیۆن کەس داواکارییان پێشکەش کردبوو.