ڕووسیا ڤیزا بە خانەوادەی ژمارەیەک کوژراوی عێراقی شەڕی ئۆکراینا دەدات

ئاڤا نیوز

باڵیۆزی ڕووسیا لە عێراق، دووپاتی کردەوە کە "ژمارەیەک چەکداری عێراقی" لە شەڕی ڕوسیا-ئۆکرانیادا شەهید بوون" و وڵاتەکەشی ڤیزای بە خانەوادەکانیان بەخشیووە. 

وێنە گەورەکە: لە سەرەتای هەڵگیرسانی جەنگی نێوان ڕووسیا و ئۆکرانیا، چەندین هاووڵاتی عێراقی پەیوەندییان بە هەردوو بەرەی شەڕەوە کردووە، پێشترێش دەزگای هەواڵگری عێراق ڕایگەیاند هەماهەنگی لەگەڵ وەزارەتی دەرەوە دەکات بۆ پەیوەندیکردن بە باڵیۆزخانەکانی عێراق لە مۆسکۆ و کیێڤ بۆ بەدواداچوون بۆ دۆسیەی ئەو هاووڵاتییە عێراقیانەی لەو دوو وڵاتە بەشدارییان لە جەنگ کردووە.

ئەوەی لەبارەیەوە دەگوترێت: ژمارەیەک هاووڵاتی عێراق و هەرێمی کوردستانیش لەڕێگەی ڕیکلامی سۆشیاڵ میدیاوە، پەیوەندییان بە ڕێزەکانی سوپای ڕووسیا و ئۆکرانیاوە کردووە، لە بەرامبەر مووچەی زۆر و پێدانی ڕەگەزنامەی ئەو دوو وڵاتە. 

لێدوانی فەرمی: ئەلبروس کۆتراشیڤ لە چاوپێکەوتنێکی تەلەڤزیۆنیدا کە "ئاڤا میدیا" بەدواداچوونی بۆ کرد وتی: "وڵاتەکەی ڤیزای بە خانەوادەی ئەو شەڕکەرە عێراقیانە بەخشیوە کە لە کاتی جەنگی ڕووسیا -ئۆکرانیا دا "شەهیدبوون"، لەبەرچاوگرتنی هۆکارە مرۆییەکان."

کۆتراشیڤ لە چاوپێکەوتنەکە ئەمانەشی وت:

_ کۆمپانیای نەوتی لوک-ئۆیل خەریکی ڕێکخستنی کشانەوەی خۆیەتی لە عێراق بەهۆی سزاکانی ئەمریکاوە،" پرسیاری ئەوەشی کرد: "بۆچی کڕینی غاز لە ئێران درێژ دەکرێتەوە بە پێچەوانەی کارکردن لەگەڵ لوک-ئۆیل؟"

_ کاتێک داعش گەیشتە بەردەم دەروازەکانی بەغدا، ئێمە گەنجینەی سوپامان بۆ عێراقییەکان کردەوە بەبێ گرێبەستی فەرمی. 

_ وڵاتەکەی ڕێکاری هەیە بۆ جیاکردنەوەی گەشتیاران لە چەکداران.

_ چەکی ئێمە لە عێراق زۆرە و ئامادەین سیستەمی بەرگریی ئاسمانی ڕادەستی عێراق بکەین.

_ گۆشارێکی دیپلۆماسی لەسەر منە لە بەغدا و ئامادەم بۆ کۆبوونەوە لەگەڵ مارک ساڤایا.

_ مافی پەنابەریی مرۆییمان بە بەشار ئەسەد بەخشیوە.