وەزیری كارو كاروباری كۆمەڵایەتی: ئەمساڵ زیاتر لە 13 هەزار گەنج بە پیشەی جیاواز ئاشناکراون

ئاڤا نیوز

وەزیری كارو كاروباری كۆمەڵایەتیی حكومەتی هەرێمی كوردستان ڕایدەگەیەنێت، ئەمساڵ 944 خولی جۆراوجۆرمان بۆ خانمان و گەنجان كردووەتەوە و بەهۆیەوە، 13 هەزار و 599 گەنج سوودمەندبوونە و بە پیشەی جۆراوجۆر ئاشنا كراون.

وێنە گەورەكە: كابینەی نۆیەمی حكومەتی هەرێمی كوردستان، لە پارێزگا و ئیدارە سەربەخۆكانی هەرێمی كوردستان، شەش سەنتەری ڕاهێنانی پیشەیی كردووەتەوە كە ڕاستەوخۆ سەر بە وەزارەتی كار و كاروباری كۆمەڵایەتیی حكومەتی هەرێمی كوردستانن، ئەو سەنتەرانە بەشێوەی بەردەوام خولی جۆراوجۆری پیشەیی لە بوارەكانی: ئارایشتگای خانمان و سەرتاشخانەی گەنجان، دروستكردنی شیرنەمەنی، چاككردنەوەی مۆبایل و ئامێرە ئەلیكترۆنییەكان و شارەزاكردنی گەنجان بە تەكنەلۆژیای شۆڤاژ و ئاو و ئاوەڕۆ.

لێدوانی فەرمی: كوێستان محەممەد، وەزیری كار و كاروباری كۆمەڵایەتیی هەرێمی كوردستان، لە لێدوانێكی ڕۆژنامەوانیدا ڕایگەیاند، ئەو سەنتەرانەی لە كابینەی نۆیەمی حكومەتی هەرێمی كوردستان كراونەتەوە، لە دوازدە مانگی ئەمساڵ، 944 خولی جۆراوجۆریان بۆ خانمان و گەنجان كردووەتەوە و بەهۆیەوە؛ 13 هەزار و 599 گەنج سوودمەندبوونە و شارەزای پیشەی جۆراوجۆر كراون.