نێچیرڤان بارزانی پەیامێكی پیرۆزبایی ئاراستەی بەرهەم ساڵح دەكات

ئاڤا نیوز

 نێچیرڤان بارزانی، سەرۆكی هەرێمی كوردستان، پەیامێكی پیرۆزبایی ئاراستەی د.بەرهەم ساڵح دەكات بە بۆنەی وەرگرتنی پۆستی كۆمیسیاری باڵای نەتەوە یەكگرتووەكان بۆ كاروباری پەنابەران.

چیرۆكی سەرەكی: ئەمڕۆ هەینی 19-12-2025، نێچیرڤان بارزانی، سەرۆكی هەرێمی كوردستان پەیامێكی بڵاوكردەوە، وێڕای پیرۆزبایی لە د.بەرهەم ساڵح بە بۆنەی پۆستە نوێیەكەی، پشتیوانیی خۆیشی بۆ ناوبراو دووپات كردەوە.

پەیامی فەرمی: نێچیرڤان بارزانی ڕایگەیاند: هیوای سەركەوتن بۆ برای ئازیزم، د.بەرهەم ساڵح، كۆمیسیاری باڵای نەتەوە یەكگرتووەكان بۆ كاروباری پەنابەران دەخوازم.

زانیاریی زیاتر: نێچیرڤان بارزانی، ئەرك و پۆستە تازەكەی د. بەرهەم ساڵحی بە ئەركێكی جیهانی و مرۆیی ناساندووە، لە پەیامەكەیدا دەشڵێ: وەرگرتنی پۆستێکی باڵای نێودەوڵەتی، لەم ئاستەدا، نیشانەی متمانەی کۆمەڵگەی نێودەوڵەتییە بە توانا و ئەزموون و پێگەی سیاسی و دیپلۆماسیی بەڕێزيان‌. مایەی شانازییە بۆ هەرێمی کوردستان و عێراق کە به‌ڕێزيان سەرپەرشتیی یەکێک لە گرنگترین دۆسیە مرۆیییەکانی جیهان دەکات.

- دڵنیام بەو ئەزموونە دەوڵەمەندەی هەيانە، دەتوانن ڕۆڵێکی كارا و كاريگه‌ر ببینن لە کەمکردنەوەی ئازاری پەنابەران و چارەسەرکردنی کێشەکانیان لەسەر ئاستی جیهان. ئێمە لە کوردستان باشتر لە هەمووان درک بە ئازاری ئاوارەیی و گرنگیی ئەو ئەرکە دەکەین.

-    هەموو پشتیوانییەکمان بۆ سەرکەوتنی به‌ڕێزيان دووپات دەکەینەوە.