ڕاگەیێنراوی ئاڤا میدیا سەبارەت بە قۆناغی نوێی هاوکاری و نیشتەجێکردنی لێقەوماوان

ئاڤا نیوز

هەڵمەتە مرۆییەکەی ئاڤا میدیا بۆ هاوکاری زیانلێکەوتووانی سنووری چەمچەماڵ و دەورووبەری، دوای کۆکردنەوەی بڕە پارەیەک لەلایەن خێرخوازن و سەرمایەداران، پێ دەنێتە قۆناغی کڕینی خانووی نیشتەجێبوون و قەرەبووکردنەوەی خێرای ئەوانەی پێویستییان بە نۆژەنکردنەوەی شوێنی ژیانیانە.

وێنە گەورەکە: هەڵمەتەکەی ئاڤا کە بۆ ماوەی سێ ڕۆژ بەردەوام بوو، ئەنجامێکی بێوێنەی بەدەستهێنا، لە کۆکردنەوەی زیاتر لە دوو ملیار دینار و کۆکردنەوەی 50 بارهەڵگر پێداویستی بەپەلە بۆ هاونیشتمانییان. 

ئەوەی ئێستا ڕوودەدات: تیمەکانی ئاڤا میدیا بەردەوام دەبن لە گەیاندنی هاوکاری بەمشێوەیە:

کڕینی خانوو: بۆ ئەو خێزانانەی بەهۆی کارەساتەکەوە خانووەکانیان بە کەڵکی ژیان نەماوە، خانوو دەکڕدرێت.

نۆژەنکردنەوە: ئەو ماڵانەی زیانیان بەرکەوتووە، بەپێی توانا دەتوانن پەیوەندی بە ئاڤاوە بکەن و لەلایەن تیمەکانمانەوە سەرلەنوێ نۆژەن دەکرێنەوە.

قەرەبووی کاسبکاران: هاوکارییەکان تەنیا بۆ ماڵان نییە، بەڵکو کاسبکارانی زیانلێکەوتووی چەمچەماڵ قەرەبوو کرانەوە؛ هەروەها تەکیە، شۆڕش و پیرەمەگروونیش دەگرێتەوە.

بۆچی گرنگە: ئەم هەڵمەتە تەنیا دابەشکردنی هاوکاری کاتی نەبوو، بەڵکو ستراتیژییەکی درێژخایەنە بۆ گەڕاندنەوەی سەقامگیری بۆ ژیانی لێقەوماوان. ئاڤا میدیا جەخت دەکاتەوە کە "تا کۆتا کەس قەرەبوو دەکرێتەوە، لە ناوچەکە دەمێنینەوە."