بەڤیدیۆ: ساتی دەستگیرکردنی ئەو تۆمەتبارەی سێ ئەندامی خانەوادەیەکی لە هەولێر کوشت

ئاڤا نیوز

بەڕێوەبەرایەتیی ئاسایشی هەولێر ڤیدیۆی ساتی دەستگیرکردنی ئەو تۆمەتبارەی بڵاوکردەوە کە لە شاری هەولێر سێ ئەندامی یەک خێزانی کوشت و دوای دەستگیرکردنی لەلایەن ئاسایشی هەولێر تۆمەتبارەکە دانی بە تاوانەکەی ناوە.

ڕاگەیێنراوەی فەرمی: بەڕێوەبەرایەتی ئاسایشی هەولێر ڕایگەیاند: لە ڕۆژی 25-01-2026 لە ڕووداوێکی تاوانی کوشتنی سێ ئەندامی خانەوادەیەک لە گەڕەکی شۆڕشی شاری هەولێر ئاگادار کراینەوە، دەستبەجێ لەلایەن تیمەکانمانەوە، دەست بە ئەنجامدانی بەدواداچوون کرا و لە ماوەیەکی کورتدا، ناسنامە و شوێنی تۆمەتبارەکەمان ئاشکرا کرد، بەناوی (أ. أ. ع)، لەلایەن دادوەری لێکۆڵینەوەی ئاسایشی هەولێر فەرمانی دەستگیرکردنی بۆ دەرکرا.

زانیاریی زیاتر: ئاسایشی هەولێر ئاماژەی بەوەش کرد، "تۆمەتبار دوای ئەنجامدانی تاوانەکەی، بە ئۆتۆمبێلی ماڵی قوربانییەکان بەنیازبووە بەرەو شاری کەرکووک ڕابکات، بەڵام لەلایەن هێزەکانی ئاسایشەوە ڕێگری لێکرا و دوای ڕووبەڕووبونەوەی لەگەڵ هێزەکانمان بە برینداری دەستگیر کرا."

ئەوەی پێویستە بیزانیت: لە کاتی لێکۆڵینەوەدا، تۆمەتبارەکە دانی بەوەدا ناوە کە بەهۆی ناسیاویی پێشوەختە لەگەڵ خانەوادەی قوربانییەکان، لە درەنگانی شەودا و بەبێ ئاگاداری چووەتە نێو ماڵەکەیان و تاوانەکەی ئەنجامداوە؛ کە کوڕێک و دایک و باوکەکەی دەکوژێت.

هۆکارە زانراوەکان: بەگوێرەی ڕاگەیێنراوی ئاسایشی هەولێر، لە ڕاپۆرتە پزیشکییەکاندا ئەوە خراوەتەڕوو کە ناوبراو نەخۆشی نەخۆشخانەی دەروونیی هەولێر بووە و نەخۆشییەکی دەروونیی درێژخایەنی هەیە، لە ئێستاشدا پەڕاوی لێکۆڵینەوەی ئاراستەی دادگا کراوە و ڕێکارە یاساییەکان بۆ یەکلاییکردنەوەی دۆسیەکە بەردەوامن.