دوو كەس دەیان ملیۆن دینار لە نووسینگەیەكی ئاڵوگۆڕی دراو لە سلێمانی دەدزن

ئاڤا میدیا

 

دوو كەس دەچنە نێو نووسینگەیەكی ئاڵوگۆڕی دراو لە گەڕەكێكی شاری سلێمانی و دەیان ملیۆن دینار دەدزن و بەرەو شوێنێکی نادیار هەڵاتوون.

 

چیرۆکی سەرەکی: شەوی ڕابردوو، ئەگەرچی بەهۆی ئەوەی شەوی بەرات بوو، شەقامەکان قەرەباڵخ و بازاڕەکان بەشێکی زۆریان کراوەبوون، بەڵام دزەکان هاتوونەتە ناو نووسینگەکە و دەمانچەیان خستووەتە سەر سەری کارمەندەکان و گڵۆپی دوکانەکەیان کوژاندووەتەوە و هەرچی پارەی لێبووە دزیویانە و  بە ماتۆڕ هەڵاتوون.

 

لێدوانی فەرمی: ڕائید ئاری لەتیف، وتەبێژی بەڕێوەبەرایەتیی پۆلیسی سلێمانی بە ئاڤا میدیای ڕاگەیاند: کاتژمێر 8:30 خولەکی شەوی 2-2-2026، لە نووسینگەیەکی ئاڵوگۆڕی دراو لە گەڕەکی ڕاپەڕین لە ڕۆژئاوای شاری سلێمانی، ڕووداوێکی دزییکردن ڕوویداوە، نووسینگەکە جگە لە ئاڵوگۆڕی دراو هاوکات شوێنی دابەشكردنی مووچەی ئاوارەی ناوچە دابڕێنراوەکانیش بووە.

زانیاری زیاتر: بە گوتەی پۆلیس، دزەکان دوو کەس بوون کە ڕووخساریان داپۆشرابوو، دوای دزیەکەیان بە ماتۆڕسکیلێکی بێ ژمارە هەڵهاتوون، هێشتا دزەکان دەستگیر نەکراون، بەڵام پەڕاوی لێکۆڵینەوە ڕێکخراوە و لە ڕێگەی کامێراکانی چاودێرییەوە هەوڵ دەدرێت دزەکان بدۆزرێنەوە.

 

سەبارەت بە بڕی پارە دزراوەكە وتەبێژی پۆلیسی سلێمانی ڕایگەیاند: بڕەکەی بە تەواوی نازانین و ڕاپۆرتی وردمان لەبەردەست نییە، بەڵام ئەوەی دەیزانین دیناری عێراقی، پاوەن، یۆرۆ، دۆلاریان دزیوە و هەڵاتوون.

 

ئەوەی پێویستە بزانرێت: بەپێی زانیارییە سەرەتاییەكان كە لە كارمەندەکانی نووسینگەكە وەرگیراوە، پارە دزراوەکە پێکهاتووە لە بڕی 33 ملیۆن و 476 هەزار دیناری عێراقی لەگەڵ 19 هەزار و 800 دۆلار، دوو هەزار پاوەند، سێ هەزار و 500 یۆرۆ.