گەشتەکانی فڕۆکەخانەی بەسرە ڕاگیران

ئاڤا نیوز

بەهۆی پچڕانی کارەبا، سەرجەم گەشتەکان لە فڕۆکەخانەی نێودەوڵەتیی بەسڕە ڕاگیران و سیستەمەکانی چاودێری و ئامێرەکانی گەشتیاری بە تەواوی لەکارکەوتوون.

کاریگەریی لێکەوتەکان: پچڕانی کارەبا، تاوەری چاودێری و سەرجەم بەشەکانی فڕۆکەخانەکەی گرتووەتەوە، ئەمەش وایکردووە فڕۆکەکان نەتوانن بنیشنەوە یان لە گەشتەکانیان بەرەو دەرەوە بە ئاسانی لەم کاتەدا بەردەوام بن.

زانیاریی زیاتر: سەرەڕای بڵاوبوونەوەی چەندین گرتەی ڤیدیۆیی کە پشتڕاستی دەکەنەوە کارەبای فڕۆکەخانەکە پچڕاوە، گەشتەکانیش وەستاون، بەڵام نە بەڕێوەبەرایەتی فڕۆکەخانەکە و نە وەزارەتی گواستنەوەی عێراق هیچ ڕوونکردنەوەیەکیان لەسەر ئەو ڕووداوە نەداوە.

لەلایەکی دیکەوە: تیمە هونەرییەکان هەوڵەکانیان بۆ دۆزینەوەی هۆکاری پچڕانەکە و چاککردنەوەی کارەبای هۆڵەکان چڕ کردووەتەوە، تاوەکو ڕێگری لە دواکەوتنی زیاتری گەشتەکان و دروستبوونی قەرەباڵغی و پەککەوتنی گەشتیاران بگرن.

باکگراوند: فڕۆکەخانەی نێودەوڵەتیی بەسڕە، لە ساڵی 1980 دامەزراوە و دووەم گەورەترین فڕۆکەخانەی عێراقە، کە خاوەنی یەکێک لە درێژترین باندەکانی فڕینە لەسەر ئاستی جیهان و تەواوی ناوچەکە لە وڵاتدا.