حکومەتی عێراق لیژنەیەکی لێکۆڵینەوە لەبارەی کوشتنی ئەفسەرەکەی کەرکووک پێکدێنێت

ئاڤا نیوز

وەزیری ناوخۆی عێراق پێکهێنانی لیژنەیەکی باڵای لێکۆڵینەوەی لە تیرۆرکردنی عەقید زەید عادل، ئەفسەری وەزارەتی ناوخۆ و ئەندامی پۆلیسی کەرکووک ڕاگەیاند.

چیرۆکی سەرەکی: ئەمڕۆ هەینی، سێ چەکداری نەناسراو، لە ناو ئۆتۆمبێلێکی جۆری تۆیۆتا کۆرۆلا، لە گەڕەکی عەرەفە دەستدڕێژی گولـلەیان لە عەقید زەید عادل جەرجیس، ئەفسەری پۆلیسی کەرکووک کرد و تیرۆریان کرد.

ڕاگەیێنراوی فەرمی: عەبدولئەمیر شەمەری، وەزیری ناوخۆی عێراق لە ڕاگەیێنراوێکدا ئاماژەی بەوە کردووە، "وەزارەتی ناوخۆ لیژنەیەکی لێکۆڵینەوەی باڵای پێکهێناوە بۆ بەدواداچوون بۆ بارودۆخی ئەم تاوانە و ئاشکراکردنی تاوانباران و هەموو کەسێک لەپشت ئەم کارە ترسنۆکانەوەن، بەمەبەستی دادگاییکردنیان بۆ ئەوەی سزای دادپەروەرانەی خۆیان بەپێی یاسا وەربگرن".

زانیاریی زیاتر: عەقید زەید عادل لە پێکهاتەی کریستیانە، پێشتر چەندین پۆستی ئەمنی هەبووە، لەوانە بەڕێوەبەری بنکەی پۆلیسی عەرەفە لە کەرکووک.