مارکۆ ڕۆبیۆ: هاوکارییەکانمان بۆ وڵاتان دەبێت خزمەت بە بەرژەوەندییە نیشتمانییەکانمان بکات

ئاڤا نیوز

وەزیری دەرەوەی ئەمریکا جەخت لەوەدەکاتەوە ئیدارەی ترەمپ کاری لەپێشینەی خزمەتکردنە بە بەرژەوەندییە نیشتمانییەکانی ئەمریکا و دەڵێت، هاوکارییەکانمان بۆ وڵاتانی جیهان دەبێت لەگەڵ بەرژەوەندییە نیشتمانییەکانمان یەکبگرێتەوە.

ئەوەی پێویستە بیزانیت: لە کۆتا کۆنفرانسی ڕۆژنامەوانی خۆی لە ساڵی 2025، مارکۆ ڕۆبیۆ، وەزیری دەرەوەی ئەمریکا تیشکی خستەسەر ئامانج و بەرژەوەندییەکانی ئەمریکا لە ڕۆژهەڵاتی ناوەڕاست و جیهان بە گشتی و کۆتاییهێنان بەو جەنگانەی کە هێشتا کۆتاییان پێنەهێنراوە.

لێدوانی فەرمی: مارکۆ ڕۆبیۆ، وەزیری دەرەوەی ئەمریکا ڕایگەیاند، یارمەتییە دەرەکییەکان چالاکییەکی جیاوازی حکومەتی ئەمریکا نین، بەڵکو توخم و ئامرازێکن لە سیاسەتی دەرەوەمان، و دەبێت بۆ مەبەستی برەودان بە بەرژەوەندییە نیشتمانییەکان بەکاربهێنرێن.

مارکۆ ڕۆبیۆ ئەمانەشی گوت:

٠ بە بڕیاری سەرۆک ترەمپ پێدانی گرین کاردمان ڕاگرت بۆ ئەوەی دڵنیاببینەوە لە باکگراوندی ئەو کەسانەی دێنە ناو ئەمریکا و پێویستە لێکۆڵینەوە لە ڕابردووی ئەو کەسانە بکەین و ئەوە مافی خۆمانە بۆ پاراستنی وڵاتەکەمان.

٠ ڕاگرتنی جەنگی غەززە یەکێکە لەو دەستکەوتە گەورانەی کە شانازی پێوە دەکەین و لەگەڵ چەندین وڵاتدا لە بارەی ئەو هێزە نێودەوڵەتییەی لە غەززە جێگیر دەکرێت قسەمان کردووە و هێشتا کاردەکەین بۆ دروستکردنی ئەنجوومەنی ئاشتی لە غەززە.

٠ دەبێت تواناکانی حەماس بە شێوەیەک لاواز بکرێن جارێکی دیکە ڕووداوەکانی حەوتی ئۆکتۆبەر دووبارە نەبنەوە، ئەمەش تەنیا بە چەکداماڵینیان ڕوودەدات و کە لە داهاتوودا نەبنە مەترسی لەسەر ئیسرائیل و ئەگەر ئەوەش ڕوونەدات ئاشتی لە غەززە نایاتە ئاراوە.

٠ کۆتاییهێنان بە جەنگی ئۆکرانیا قورسە و کاردەکەین بۆ ئەوەی ڕووسیا و ئۆکرانیا بگەنە خاڵێک کە هەردوولایان قبووڵی بکەن و هەنگاوی گرنگمان ناوە بۆ کۆتاییهێنان بە جەنگەکە.

٠ چین وڵاتێکی گەورەیە و ڕۆڵێکی گرنگی جیۆسیاسی هەیە و دەمانەوێت بەشێوەیەک مامەڵە لەگەڵ ئەو وڵاتە بکەین نەبێتە هۆی زیانگەیاندن بە پابەندبوونمان بە وڵاتانی ژاپۆن و کۆریای باشوور.

٠ وڵاتی ڤەنزوێلا لە ناو خاکی وڵاتەکەی لەگەڵ تاوانباران و مافیاکان و تەنانەت لەگەڵ ئێران و حیزبوڵڵاش کاردەکەن و هەڕەشەن بۆ سەر ئاسایشی نیشتمانیمان و ئەوەی ئێمەش دەمانەوێت ئەوەیە وڵاتانی مەکسیک و ڤەنزوێلا هەماهەنگیمان لەگەڵ بکەن بۆ ئەوەی ڕێگری بکرێت لە ناردنی ماددە هۆشبەرەکان بە ڕێگەی قاچاغ بۆ ئەمریکا.

٠ نامانەوێت حیزبوڵڵا تواناکانی ڕێکبخاتەوە و ببێتە مەترسی لەسەر ئیسرائیل، دەمانەوێت چەک تەنیا بە دەستی حکومەتی لوبنانەوە بێت.