ئەمریكا لە هێرشێكی ئاسمانی لە نزیک دێرەزوور سەركردەیەكی داعش دەكوژێت

ئاڤا نیوز

هێرشە ئاسمانییەکانی ئەمریکا پێگەکانی داعش لە ڕۆژهەڵاتی ڕەققە و ڕۆژئاوای دێرەزوور دەکەنە ئامانج، لە ئەنجامی ئەو هێرشانەش سەرکردەیەکی شانە نووستووەكانی داعش كوژراوە.

ڕاگەیێنراوی فەرمی: ڕوانگەی سووری بۆ مافەکانی مرۆڤ بڵاویکردووەتەوە، هێرشە ئاسمانییەکانی ئەمریکا بەیاوەری هێزی زەمینیی هەسەدە و هاوپەیمانیی نێودەوڵەتی، پێگەکانی داعشیان لە ناوچەکانی ڕۆژهەڵاتی ڕەقە و ڕۆژئاوای دێرەزۆر کردووەتە ئامانج و بەهۆیەوە سەرکردەیەکی دیاری داعش كە بە "ئەبو یوسف" ناودەبرێت و چەند ئەندامێکی دیكەی شانە نووستووەكانی داعش كوژراون كە پێشتر بەرپرس بوونە لە هێرشە تیرۆرستییەکانی سەر دێرەزوور لە ڕۆژئاوای كوردستان.

زانیاریی زیاتر: ڕوانگەی سووری ئاماژەی بەوەشكردووە، هێرشەكە بەدیاریكراوی لە شارۆچكەی مەعدان كراوە كە ئێستا لەژێر دەسەڵاتی حكومەتی كاتیی سووریایە و شانە چەكدارەكانی داعش لە ناوچەكانی ژێر كۆنتڕۆڵی هێزەكانی سووریای دیموكراتەوە چوونەتە ئەو شوێنە.

ئەوەش بزانە: لە هێرشە ئاسمانییەكەی ئەمریكا بۆ سەر خانووی سەركردەكەی داعش، ژنێك و مێرمنداڵێكی تەمەن 14 ساڵیش گیانیان لەدەستداوە كە پێدەچێت هاوسەر و منداڵی ئەو داعشە بن، سەرجەم كوژراوان و بریندارانی ئەو هێرشە گواستراونەتەوە بۆ بنكەی سەربازیی ئەمریكا لە ڕۆژئاوای كوردستان.