واشنتن: ڕووسیا و ئۆکراینا خۆیان بڕیار دەدەن

ئاڤا نیوز

ویلایەتە یەکگرتووەکانی ئەمریکا جەخت دەکاتەوە کە کیێڤ و مۆسکۆ بۆ هیچ ڕێککەوتنێکی ئاشتی ناچار ناکات و بڕیاری کۆتایی لای هەردوولایە.

لێدوانی فەرمی: مارکۆ ڕۆبیۆ، وەزیری دەرەوەی ئەمریکا ڕایگەیاند؛ هیچ ڕێککەوتنێکی ئاشتی بەبێ ڕەزامەندیی ئۆکراینا سەرناگرێت. ئاماژەی بەوەش کرد، واشنتن ناتوانێت لایەنەکان بۆ واژۆکردنی هیچ ڕێککەوتنێک ناچار بکات، بەڵکو دەبێت هەردوولا ئارەزووی ئەوەیان هەبێت شەڕ ڕابگرن.

ئەوەی پێویستە بیزانیت: بڕیارە ئەمڕۆ شەممە کیریل دیمیتریڤ، نوێنەری ڕووسیا بگاتە شاری میامی بۆ دەستپێکردنی خولێکی نوێی دانوستانەکان لەگەڵ لایەنی ئەمریکی؛ ئەمەش دوای کۆبوونەوەکەی ڕۆژی هەینی دێت کە بەرپرسانی ئەمریکا لەگەڵ لایەنی ئۆکراینی و ئەورووپی ئەنجامیان دا.

لەلایەکی دیکەوە: ڤلادیمێر پووتین، سەرۆکی ڕووسیا ئامادەیی وڵاتەکەی بۆ ڕێککەوتن نیشان داوە و ڕایگەیاندووە، ئێستا کاتی ئەوەیە ئۆکراینا و هاوپەیمانە ڕۆژائاواییەکانی هەنگاوی کردەیی بنێن.