ژمارەیەک كۆچبەری ئەفغانی لەسەر سنووری ئێران لە سەرما ڕەق بوونەوە

ئاڤا نیوز

بەهۆی شەپۆلی سەرمایەکی بەهێز لە سنوورەکانی نێوان ئەفغانستان و ئێران، گرووپێکی کۆچبەرانی ئەفغانی ڕەق بوونەوە و لانیکەم 15 کەسیان گیانیان لەدەستدا.

چیرۆکی سەرەکی: میدیاکانی ئەفغانستان ڕایانگەیاند، تەرمی 15 کۆچبەر کە ژن و منداڵیان تێدایە، لە سنووری "ئیسلام قەلعە"ـی شاری هیرات دۆزرانەوە. گرووپەکە لە 40 کەس پێکهاتوون و ویستوویانە بە نایاسایی بچنە ناو خاکی ئێران، بەڵام لە ڕێگەکەدا تووشی سەرمایەکی کوشندە بوون و تەنیا 15 تەرمیان دۆزراونەتەوە.

زانیاریی زیاتر: سەرەڕای ئەوەی ئێران بەبەردەوامی کۆچبەرانی ئەفغانی دیپۆرت دەکاتەوە، بەڵام هاووڵاتییانی ئەو وڵاتە بەهۆی نەبوونی هەلی کار و دۆخی خراپی ئابوورییەوە، بەردەوام ڕوو لە وڵاتانی هاوسنووریان دەکەن و ڕێگە مەترسیدارەکان دەگرنە بەر.

ئەمەش بزانە: ئەمە دووەم ڕووداوی لەو شێوەیەیە لە ماوەی هەفتەیەکدا؛ پێنجشەممەی ڕابردووش هەر بەهۆی سەرماوە، پێنج کۆچبەری دیکەی ئەفغانی لە کاتی پەڕینەوەیان بەرەو ئێران گیانیان لەدەستدا.