نەتەوە یەکگرتووەکان: لە ئەفغانستان داعش مەشق بە منداڵان دەکات

ئاڤا نیوز

ڕاپۆرتێکی نەتەوە یەکگرتووەکان ئاشکرای دەکات، ڕێکخراوی "داعشی خوراسان" نزیکەی دوو هەزار چەکداری لە ئەفغانستان هەیە. ئاماژە بەوەش دەکات ڕێکخراوەکە بیرۆکە تووندڕەوەکانی خۆی بە منداڵانی خوار تەمەن 14 ساڵ دەسپێرێت و بەهۆی بەردەوامیی کردەوە تیرۆریستییەکانی، بووەتە هەڕەشە بۆ سەر ئاسایشی ناوچەکە.

وێنە گەورەکە: گەشەسەندنی چەکدارانی داعش - خوراسان و بەکارهێنانی منداڵان بۆ ئامانجە تیرۆریستییەکان، هەڕەشەیەکی گەورەیە بۆ ئاسایشی ناوچەیی و نێودەوڵەتی، پێویستی بە هەوڵی جددی هەیە بۆ بنبڕکردنی.

بڵاوکراوەی فەرمی: بەگوێرەی ئاژانسی "خاما پرێس"ـی ئەفغانی، لە ڕاپۆرتەکەدا هاتووە کە "پەشتوونە ئەفغانییەکان باڵادەستن بەسەر سەرکردایەتیی داعش لە ئەفغانستان، لەکاتێکدا زۆرێک لە چەکدارەکانیان خەڵکی وڵاتانی ئاسیای ناوەڕاستن."

ئەوەی ئێستا ڕوودەدات: ئامانجە سەرەکییەکانی داعشی خوراسان بریتین لە ئەنجامدانی هێرشی بەرفراوان لەسەر ئاستی جیهان و نیشاندانی توانای ڕێکخراوەکە لە ڕاکێشانی چەکداری نوێ و بەدەستهێنانی پشتگیریی دارایی.

ئەوەی پێویستە بیزانیت: ئەوەی زیاتر بووەتە جێی نیگەرانی ئەوەیە کە داعشی خوراسان لە ناوچەکانی باکووری ئەفغانستان و خاڵە سنوورییەکانی نزیک پاکستان، چەندین قوتابخانەی دامەزراندووە، لەوێدا منداڵانی خوار تەمەن 14 ساڵ پەروەردە دەکرێن و مەشقیان پێ دەکرێت بۆ ئەنجامدانی کردەوە خۆکوژییەکان.