بۆ مووچەی مانگی 10 تەیف سامی سێ داواکاری هەیە؛ کەی پارە دەگات؟

ئاڤا نیوز

هەوڵەکان بۆ مووچەی مانگی 10 چڕکراونەتەوە ئەم هەفتەیە بنێردرێت و تێکەڵ بە دابەشکردنی مووچەی فەرمانبەرانی عێراق نەکرێت و تەیف سامی سێ داواکاری هەیە بۆ ناردنی پارە.

وێنە گەورەکە: هەوڵەکانی حکومەتی کوردستان بۆ خەرجکردنی مووچەی مانگی 10 بەر لە سەری ساڵ بەردەوامن، میزان موراجەعە و داهاتی ناوخۆ ئامادەن و لەم هەفتەیە ڕەوانەی بەغدا دەکرێن.

زانیاریی تایبەت: سێشەممەی ڕابردوو پێش کۆبوونەوەی ئەنجوومەنی وەزیرانی عێراق، بەرپرسێکی باڵای کورد لە بەغدا قسەی لەگەڵ تەیف سامی، وەزیری دارایی عێراق کردووە، پێی وتووە وەرزی سەرمایە، لە کوردستان بەفر و بارانە، خەڵک پێویستی بە نەوت و کەلوپەلی زستان و ئامێرەکانی خۆگەرمکردنەوەیە، لافاو هاتووە و خەڵک بارودۆخی خراپە، بۆیە داوا دەکەم ئەم مووچەیە زوو بنێریت و تێکەڵ بە مووچەی عێراق نەکرێت. بەتایبەت مووچەی مانگی 10ـیە و لە عێراق مووچەی مانگی 12 دابەش دەکرێت.

لە وەڵامدا تەیف سامی وتوویەتی کێشەمان نییە دەینێرین، بەڵام ئەم سێ داواکارییەم بۆ جێبەجێ بکەن:

یەکەم: میزان موراجەعەی مانگی 10 بنێرن، ڕاپۆرتی داهات و خەرجییەکانی حکومەت. ئەم ڕاپۆرتە ئێستا لە بەغدایە و ئامادەیە.

دووەم: حکومەتی کوردستان 120 ملیار دینارەکەی داهاتی ناوخۆ بنێرێت. داهاتەکە ئامادەیە، نووسراوی ناردنیش کراوە، تەنیا ئەوە ماوە بە کاش بخرێتە سەر هەژماری بانکی ناوەندیی عێراق لە لقی هەولێر.

سێیەم: ڕاپۆرتی ئەم مانگەی هەناردەکردنی نەوتی کوردستانم بۆ بنێرن، چەند هەزار بەرمیل هەناردەکراوە و داهاتەکەی چەند بووە. ئێستا لە وەزارەتی دارایی عێراقە و سبەی تەواو دەکرێت.

لێدوانی فەرمی: ئەو بەرپرسە باڵایە بە ئاڤای وت، ئەگەر سبەی یەکشەممە هەرسێ داواکارییەکە جێبەجێ بکرێن، لە دووشەممەوە دەست بە جێبەجێکردنی ڕێکارەکان دەکرێ و تا کۆتایی ئەم هەفتەیە پارە دەنێردرێت، ئەگەرنا دوادەکەوێت، ڕەنگە ناردنی مووچە لە بەغدا دوابکەوێت بۆ 28 و 29ـی ئەم مانگە.

چونکە ئەگەر دووشەممە بنێردرێن دەکەوێتە کۆتایی دەوام و سێشەممە بەدەست تەیف سامی دەگەن، بە دوو ڕۆژیش زەحمەتە هەموو ڕێکارەکان تەواو بکرێن.

بەپێی زانیارییەکانی ئاڤا، بەرپرسە باڵاکەی کورد بەردەوام لەگەڵ تەیف سامی لەسەر هێڵە، ڕۆژی پێنجشەممەش لەگەڵی کۆبووەتەوە.