حکومەتی عێراق سێ ملیار دینار بۆ چەمچەماڵ تەرخان دەکات

ئاڤا نیوز

حکومەتی عێراق بڕی سێ ملیار دینار بۆ نۆژەنکردنەوەی ژێرخانی چەمچەماڵ، تەکیە و شۆڕش کە بەر لافاو کەوتوون تەرخان دەکات، بەرپرسێکی باڵا دەڵێت، باوەڕمان بەو کۆمیسیۆن و لیژنەیە نییە کە پێکهێنراوە، خۆمان لەڕێگەی لیژنەی خۆمانەوە پارەکە خەرج دەکەین.

ئەوەی پێویستە بیزانیت: محەممەد شیاع سوودانی، سەرۆکوەزیرانی عێراق لیژنەیەکی پێکهێنابوو بۆ لێکۆڵینەوە لە لافاوەکەی چەمچەماڵ و هەڵسەنگاندن بۆ زەرەر و زیانەکان. بە کردەیی سەردانی ناوچەکەیان کرد و ڕاپۆرتێکیان ئامادە کرد.

بەدواداچوونی ئاڤا: لە ڕۆژانی ڕابردوودا ئاڤا بەدواداچوونمان کرد ئایا لیژنەکە بە چی گەیشتووە، چی دەکات بۆ چەمچەماڵ و تەکیە و شۆڕش و پیرەمەگروون. بەڵێنمان وەگرت لە حکومەتی عێراق، وتیان بڕی سێ ملیار دینارمان تەرخان کردووە، نووسراوی خەرجکردنی پارەکەشمان کردووە و لە سبەیەوە کاری لەسەر دەکرێت و لە ڕۆژانی داهاتوودا پارە دەنێردرێت.

لێدوانی فەرمی: بەرپرسێکی باڵای حکومەتی عێراق بە ئاڤای وت: پارەکە بۆ نۆژەنکردنەوەی ژێرخانی ئەو ناوچانەیە بەر لافاو کەوتوون، هەمووی چاک دەکەینەوە، وەکو پرد و ڕێگا و پڕۆژەکانی حکومەت.

ئاماژەی بەوەشکرد، ئێمە باوەڕمان بە کۆمیسیۆن و لیژنە نییە، خۆمان ناوەندی بەڕێوەبردنی قەیرانەکانمان هەیە سەر بە وەزارەتی ناوخۆیە، ئەوان بە کارەکە هەڵساون، پارەکەش لەڕێگەی ئەوان خەرج دەکرێت.

ئەوەی پێویستە بیزانیت: بەهۆی ئەوەی لە کوردستان هیچ فەرمانگەیەکیان نییە، دەبێت بە هەماهەنگی لەگەڵ وەزارەتی ناوخۆی کوردستان پارەکە خەرج بکرێت و پڕۆژەکە جێبەجێ بکرێت.