ڕەسووکە، پێشکەشکارە خۆشەویستەکەی خەڵک دەرکەوتەوە

ئاڤا نیوز

ڕەسووکە، پێشکەشکارە خۆشەویستەکەی خەڵک و ئاڤا، دوای ماوەیەک لە دیارنەمانی دەرکەوتەوە. ڕەسووکە دەڵێت، لە سەردەشتی ڕۆژهەڵاتی کوردستان بووین، لەگەڵ ئیدارەی شارەکە ناتێگەیشتنێک هەبوو، چەند ڕۆژێک ڕایانگرتین.

چیرۆکی سەرەکی: ڕەسووکە، پێشکەشکاری خۆشەویستی خەڵک و ئاڤا، بەشداری هەواڵەکانی سەعات حەوتی ئاڤای کرد و لەگەڵ هەوراز گوڵپی لەبارەی دیارنەبوونی لەوماوەیە، گفتوگۆیان کرد.

هەوراز گوڵپی: ئەو ماوەیە دیارنەبوویت، دەستبەسەرکرابوویت؟

ڕەسووکە: ئەو ماوەیە لە سەردەشت بووین، بۆ ڕووماڵی فێستیڤاڵی بەیت و حەیران، هاوکات بۆ تۆمارکردنی چەند بەرنامەیەک، "بەهۆی ناتێگەیشتنێک ئەو ماوەیە لەلایەن بەرپرسانی ئیداری ئەوێ ناڵێم دەستبەسەرکرابووین، بەڵکو میوان بووین"، ئێمە بەردەوام بووین لەکاری میدیایی خۆمان و چەندین بەرنامەی ناوازەمان تۆمارکردووە، لە ماوەی داهاتوو دەیانبینن.

هەوراز گوڵپی: ئێستا لە کوێیت؟

ڕەسووکە: من ئێستا لە ڕانیەوە ڕاستەوخۆ قسەت لەگەڵ دەکەم، هەموو ستافەکە لێرەین و خەریکی کاری میدیایی خۆمانین.

باکگراوند: نزیکەی دوو هەفتە لەمەوبەر ستافی بەرنامەی 'ڕەسووکە لێرەیە' بەمەبەستی ڕووماڵکردنی فێستیڤاڵی بەیت و حەیران، سەردانی شاری سەردەشتی ڕۆژهەڵاتی کوردستانی کرد و چەندین بەرنامەیان تۆمارکرد.