جووتیارانی هەولێر و دهۆک شایستە داراییەکانیان وەردەگرن

ئاڤا نیوز

لە سایلۆکانی هەولێر و دهۆک، دابەشکردنی چەکی جووتياران دەست پێدەکات و شایستە داراییەکانیان وەردەگرن. بەڵام پارەی جووتیارانی سلێمانی و هەڵەبجە دوادەکەوێت.

ژمارەکان وادەڵێن: 24 ملیار و 250 ملیۆن دینار وەک شایستە داراییەکانی هەر چوار پارێزگاکەی هەرێمی کوردستان، لەلایەن بەغداوە نێردراوە، هێشتا نزیکەی 244 ملیار دینار دەمێنێت، کە دەکەوێتە ساڵی داهاتوو.

لێدوانی فەرمی: نەوزاد شێخ کامیل، بەڕێوەبەری گشتی بازرگانی، لە وەزارەتی بازرگانی و پیشەسازی بە ئاڤای گوت، "سبەی جووتیارانی سنووری هەولێر و دهۆک ئەوانەی لە یەک تۆن تاوەکو 500 تۆنیان ڕادەستی سایلۆکان کردووە، چەکی بانکیان پێدەدرێت و شایستە داراییەکانیان وەردەگرن."

لەلایەکی دیکەوە: نەسرین ئەحمەد، بەڕێوەبەری سایلۆکانی سلێمانی؛ بە ئاڤای ڕاگەیاند، "پشکی جووتیارانی سلێمانی و هەڵەبجە لە ڕێگەی بانکی حکومییەوە دەبێت، تاوەکو ئێستا چەکەکانمان بۆ نەنێردراوە و ئەگەر لەم دوو ڕۆژە بگات ڕۆژی سێشەممە دەست بە خەرجکردنیان دەکەین."

زانیاریی زیاتر: ئەو 24 ملیار و 250 ملیۆنەی ئەم قۆناغە هاتووە بەمشێوەیە بەسەر پارێزگاکاندا دابەش دەبێت:

٠ هەولێر: حەوت ملیار و 750 ملیۆن دینار
٠ سلێمانی و هەڵەبجە: نۆ ملیار و 500 ملیۆن دینار
٠ دهۆک: حەوت ملیار دینار