ترەمپ ئەو باڵیۆزانەی ئەمریکا دوور دەخاتەوە کە بایدن داینابوون

ئاڤا نیوز

 

دۆناڵد ترەمپ، سەرۆکی ئەمریکا ئەو باڵیۆزانەی وڵاتەکەی دووردەخاتەوە کە جۆ بایدن، سەرۆکی پێشووی ئەمریکا داینابوون، ترەمپ پێی ڕاگەیاندوون: سەری ساڵ دەستبەرداری پۆستەکانتان ببن.

زانیاریی بەدەستهاتوو: بەگوێرەی زانیارییەکانی بەرپرسێکی وەزارەتی دەرەوەی ئەمریکا کە قسەی بۆ پێگەی پۆلیتیکۆی وڵاتەکەی کردووە، نزیکەی 24 باڵیۆز دیاریکراون و ئاگادارکراونەتەوە کە دەبێت تا 15 یان 16ی مانگی یەکی 2026پۆستەکانیان جێبهێڵن.

بەپێی زانیارییەکان، باڵیۆزەکان لە سەرانسەری جیهان، بە تەلەفۆن پەیوەندییان پێوەکراوە و پێیان وتراوە: خۆتان کۆبکەنەوە، چونکە دەبێت دەستبەرداری پۆستەکانتان ببن، بەبێ ئەوەی هیچ هۆکارێکی ڕوونیان پێ بگوترێت.

ئەمەش بزانە: بەپێی سیاسەتی ئەمریکا هەر سەرۆکێکی نوێ دێتە کۆشکی سپی، باڵیۆزەکان دەگۆڕێت، بەڵام ئەمانەی ترەمپ دەیەوێت بیانگۆڕێت بە باڵیۆزانی پیشەگەر ناسراون و ئەزموونێکی زۆرییان هەیە و چونکە ئەوان وەک فەرمانبەری دەوڵەت و بێ لایەن دەبینرێن کە کار بۆ جێبەجێکردنی سیاسەتی هەر سەرۆکێک دەکەن لە کۆشکی سپی بێت.

هۆکارە زانراوەکان: ئیدارەی ترەمپ چەندین جار گومانی خۆی بەرامبەر بە کارمەندانی وەزارەتی دەرەوە نیشانداوە و بەشێک لە بەرپرسانی ئیدارەکەی، ئەو وەزارەتەیان بە "پەناگەی لیبراڵەکان" وەسف کردووە.

وەزارەتی دەرەوەی ئەمریکا دەڵێت، گۆڕینی باڵیۆزەکان پرۆسەیەکی ئاساییە لە هەر ئیدارەیەکدا. باڵیۆز نوێنەری سەرۆکە و مافی سەرۆکە دڵنیا بێتەوە لەوەی کەسانێک لەو پۆستانەن کە کار بۆ ئەجێندای ئەمریکا دەکەن.

بۆچوونی لایەنی بەرامبەر: دیموکراتەکانی ئەمریکاش هۆشداری دەدەن ئێستا نزیکەی 80 پۆستی باڵیۆزی ئەمریکا لە جیهاندا چۆڵن و دەڵێن: ترەمپ بە دوورخستنەوەی دیپلۆماتکارە بە ئەزموونەکان، "پێگەی سەرکردایەتیی ئەمریکا بۆ چین و ڕووسیا چۆڵ دەکات".