پووتین ئامادەیی خۆی بۆ گفتوگۆ لەگەڵ ماکرۆن دەردەبڕێت

ئاڤا  نیوز

 

کۆشکی سەرۆکایەتیی ڕووسیا دەڵێت، ڤلادیمێر پووتین ئامادەیی خۆی بۆ گفتوگۆ لەگەڵ ئیمانوێل ماکرۆن هاوتا فەرەنسییەکەی دەربڕیووە.

لێدوانی فەرمی: دیمیتری پێسکۆڤ، وتەبێژی کۆشکیی سەرۆکایەتیی ڕووسیا 'کرێملین' ڕایگەیاند، پووتین "ئامادەیی خۆی دەربڕی بۆ بەشداریکردن لە گفتوگۆ لەگەڵ ماکرۆن"، دەشڵێت ئەگەر ئیرادەی سیاسی هاوبەش هەبێت، ئەوا بە شێوەیەکی ئەرێنی سەیر دەکرێت.

 

زانیاریی بەدەستهاتوو: پووتین پێشتر ڕایگەیاندبوو وڵاتەکەی ئامادەیە بۆ ڕێککەوتن و ئێستا کاتی ئەوەیە ئۆکرانیا و هاوپەیمانە ڕۆژئاواییەکانی هەنگاو بنێن. لەژێر ڕۆشنایی ئەمەدا ماکرۆن ئاشکرای کرد کە پێی وایە ئەوروپا پێویستە جارێکی تر لەگەڵ پووتین گفتوگۆ بکات بۆ هەنگاونان بۆ کۆتاییهێنان بە شەڕی ئۆکرانیا.

 

ئەوەی ئێستا ڕوودەدات: نوێنەرانی ترەمپ زنجیرەیەک گفتوگۆی جیاواز لەگەڵ مۆسکۆ لەلایەک و لەگەڵ لایەنی ئۆکرانی و ئەوروپییەکان لەلایەکی دیکە ئەنجام دەدەن، بەو هیوایەی بگەنە ڕێککەوتن لەسەر جەنگی ئۆکرانیا.