سامانەکەی ئیلۆن مەسک گەیشتە 749 ملیار دۆلار

ئاڤا نیوز 

 

ئیلۆن مەسک، ملیاردێری ئەمریکی و خاوەنی کۆمپانیاکانی تێسلا و سپەیس ئێکس، بووە یەکەم کەس لە مێژوودا کە سەروەتەکەی 700 ملیار دۆلار تێپەڕێنێت. 

 

هۆکارە زانراوەکان: ئەم هەڵکشانە گەورەیە دوای ئەوە هات دادگای باڵای ویلایەتی دێلاوێر بڕیارێکی پێشووی دادگایەکی نزمتری هەڵوەشاندەوە و مافی خاوەندارێتیی کۆمەڵێک پشکی تێسلای بۆ مەسک گەڕاندەوە کە بەهاکەیان 139 ملیار دۆلارە.

 

زانیاریی بەدەستهاتوو: بەگوێرەی خەمڵاندنەکانی گۆڤاری فۆربس، لە ئێستادا سەروەتی مەسک گەیشتووەتە 749 ملیار دۆلار. ئەمەش دوای ئەوە دێت کە دادگا بڕیاری دا هەڵوەشاندنەوەی پشکەکان کارێکی نادادپەروەرانە بووە، بەو هۆیەشەوە فۆربس ئەو داشکاندنە 50٪یەی لادا کە پێشتر لەسەر بەهای پشکەکانی مەسک داینابوو.

 

زانیاریی زیاتر: تەنیا لە کۆمپانیای تێسلا مەسک بە بەهای 338 ملیار دۆلار پشکی هەیە. جگە لەمەش، مەسک چاوەڕوانی پاداشتێکی تری گەورەتر دەکات کە ئەگەر تێسلا بتوانێت ئامانجە ئابوورییە گەورەکانی بپێکێت، ڕەنگە یەک تریلیۆن دۆلاری تر وەک پشک بەدەستبهێنێت.

 

لە لایەکی ترەوە: لە کۆمپانیای سپەیس ئێکس کە بەهاکەی بە 800 ملیار دۆلار دەخەمڵێندرێت، پشکی مەسک تێیدا گەیشتووەتە 336 ملیار دۆلار. شارەزایان پێشبینی دەکەن ئەگەر سپەیس ئێکس لە ساڵی 2026دا بچێتە ناو بازاڕی پشکەکانەوە، بەهاکەی بگاتە 1.5 تریلیۆن دۆلار، ئەمەش ئیلۆن مەسک دەکاتە یەکەم تریلیۆنێر لە مێژووی مرۆڤایەتیدا.

 

ئەوەش بزانە: مەسک ئێستا بە جیاوازییەکی یەکجار زۆر لە پێش هەموو دەوڵەمەندەکانی تری جیهانە. لاری پەیج، هاودامەزرێنەری گووگڵ و دووەم دەوڵەمەندترین کەسی جیهان، سەروەتەکەی 253 ملیار دۆلارە، ئەمەش واتە ئیلۆن مەسک بە تەنیا نیو تریلیۆن دۆلار لە دووەم دەوڵەمەندترین کەسی جیهان دەوڵەمەندترە.