ئاڤای خەڵک؛ 20 گوندی ناحیەی بجیل بێ تۆڕی مۆبایلن و بۆ تەلەفۆنێک دەچنە سەر بەرزاییەکان

ئاڤا نیوز

لە ناحیەی بجلیی سەر بە قەزای ئاکرێ، دانیشتووانی 20 گوند بەدەست نەبوونی تۆڕەکانی مۆبایلەوە گرفتاربوون؛ بۆ پەیوەندییەکی تەلەفۆنیی زەروور، دەبێت ماڵەکانیان جێبهێڵن و بچنە سەر بەرزاییەکان.

کێشەی سەرەکی: دانیشتووانی ئەو 20 گوندە لە ناوماڵەکانیاندا هیچ نیشانەیەکی (شەبەکە) مۆبایلیان نییە. ئەمەش وایکردووە بۆ هەر پەیوەندییەکی کتوپڕ یان کارێکی پێویست، پەنا ببەنە بەر شاخ و بەرزاییەکانی دەورووبەری گوندەکانیان تاوەکو پەیوەندییەک بکەن.

لێدوانی فەرمی: بەشار محەممەد، بەڕێوەبەری ناحیەی بجیل بە ئاڤا نیوزی ڕاگەیاند: چوار ساڵ لەمەوبەر بڕیار بوو بورجێکی مۆبایل لە ناوچەکە دابنرێت، بەڵام تاوەکو ئێستا جێبەجێ نەکراوە.

- سنوورەکە بە لایەنی کەمەوە پێویستی بە سێ تا چوار بورجی گەیاندن هەیە بۆ ئەوەی کێشەکە بەتەواوی چارەسەر بێت.

چارەسەرەکان: بەڕێوەبەری ناحیەکە ئاماژەی بەوە کرد کە لیژنەیەکی تایبەت سەردانی ناوچەکەیان کردووە و دەرخستەی پێویستیان ئامادە کردووە. هەموو ڕێکارە کارگێڕییەکان لەلایەن حکومەتەوە تەواو کراون و ئێستا بابەتەکە لەلای کۆمپانیای کۆڕەک تێلیکۆمە.