عێراق بیر لە دامەزراندنی پەیمانگایەکی نیشتمانی بۆ زێڕنگەران دەکاتەوە

ئاڤا نیوز

ڕاوێژکارێکی دارایی سەرۆکوەزیرانی عێراق ئاشکرای دەکات، ئاراستەیەک هەیە بۆ دامەزراندنی پەیمانگەیەکی نیشتمانی بۆ ڕاهێنانی زێڕنگەران و دیزاینەران بە پێوەرە نێودەوڵەتییەکان. ئەمەش لەچوارچێوەی پڕۆژەی "شاری زێڕ" دێت کە ئەنجوومەنی وەزیران تازە پەسەندی کردووە.

ئەوەی پێویستە بیزانیت: پڕۆژەی "شاری زێڕ" تەنیا پڕۆژەیەکی پیشەسازی نییە، بەڵکو ستراتیژییەکە بۆ بووژاندنەوەی کەرتێکی گرنگی ئابووری، دروستکردنی هەلی کار و بەهێزکردنی ناوبانگی عێراق وەک ناوەندێکی هەرێمی بۆ پیشەسازی و بازرگانیی زێڕ.

لێدوانی فەرمی: مەزهەر محەممەد ساڵح، ڕاوێژکاری دارایی سەرۆکوەزیرانی عێراق بە ڕۆژنامەی فەرمی ڕاگەیاند، "شاری زێڕ" پشتگیری لە پیشەسازییە دەستییە تایبەتمەندەکان و پیشەسازییە گۆڕاوەکان دەکات. شارەکە بازاڕ و بۆرسەیەکی پێشکەوتووی بازرگانیکردنی زێڕ و کانزا بەنرخەکان و یەکەی پیشەسازی و سەنتەری ڕاهێنانی تێدا دەبێت، بە ئامانجی خۆماڵیکردنی پیشەسازیی زێڕ و بەهێزکردنی بەرهەمی ناوخۆ و گۆڕینی بەغدا بۆ ناوەندێکی هەرێمی لەم بوارەدا.

لەهەمانکاتدا: ساڵح ئاماژەی بەوەدا، "شاری زێڕ" پێویستی بە ژێرخانی پێوەرە جیهانییەکان دەبێت لە ئاسایش، پەیوەندییەکان، ئاوی پاک، بەڕێوەبردنی پاشماوەی کانزایی و وێستگەی کارەبا، لەگەڵ گواستنەوەی تەکنۆلۆژیا و بونیادنانی تواناکان.