زانیاریی ئاڤا: تەنیا 48 ملیار داهاتی سلێمانی ماوە و ئەمڕۆ داهاتی ناوخۆ دەنێردرێت

ئاڤا نیوز

بەپێی ئەو زانیارییانەی دەست ئاڤا میدیا كەوتووە، بڕی ، 72 مليار دینار وەك داهاتی هەولێر و دهۆك، لە دوێنێوە بە كاش گەیشتووەتە لقی هەولێری بانكی ناوەندیی عێراق، كەمێكی دیكەش 48 ملیار دینارەكەی داهاتی سلێمانی دەگات. هەر ئەمڕۆ كۆی بڕی 120 ملیار دینارەكە دەگوازرێتەوە سەر هەژماری لقی هەولێری بانكیی ناوەندی، بۆ ئەوەی لەم هەفتەیە بڕیار لەبارەی ناردنی مووچەی مانگی 10 بدرێت.

چیرۆکی سەرەکی: سبەی كۆبوونەوەی ئەنجوومەنی وەزیرانی فیدراڵە، لە بڕگەی سێیەمی كۆبوونەوەكە بەشێكی بۆ باسكردنی شایستە داراییەكانی مووچەخۆرانی هەرێمی كوردستان دانراوە، كە لەپاڵ مووچەی مانگی 10، باس لە مووچەكانی مانگی 11 و 12ـیش دەكرێت. بۆ ئەم مەبەستەش ماوەی چەند ڕۆژێكە تیمێكی تەكنیكی حكومەتی هەرێمی كوردستان لە بەغدان، بۆ خستنەڕووی داتاكانی خەرجی و داهات و بڕی ئەو پارەیەی ئەمساڵ بۆ هەرێمی كوردستان نێردراوە.

زانیاریی پەیامنێر: هیشام محەممەد، پەیامنێری ئاڤا لە هەولێر لە زاری بەرپرسانی وەزارەتی دارایی و ئابووریی هەرێمی كوردستانەوە پشتڕاستیكردەوە، 72 مليارەكەی داهاتی هەولێر و دهۆك، لە دوێنێوە بە كاش گەیشتووەتە لقی هەولێری بانكی ناوەندیی عێراق، تەنیا 48 ملیار دینارەكەی داهاتی سلێمانی ماوە كە ئەمڕۆ دەگاتە لقی هەولێری بانكەكە. كەمێكی تر بڕی 120 ملیار دینارەكە بۆ سەر هەژماری بانكیی وەزارەتی دارایی عێراق دەگوازرێتەوە.

لەلایەكی دیكەوە: وەزارەتی نەوتی عێراق، ئەمڕۆ نووسراوی داهات و هەناردەی نەوتی کوردستانی بۆ وەزارەتی دارایی عێراق دەنێرێت. میزان موراجەعەی مانگی 10، ڕاپۆرتی داهات و خەرجییەکانی حکومەتیش هەفتەی ڕابردوو بۆ بەغدا نێردراوە و ئامادەیە، واتە ئەو سێ داواکارییەی تەیف سامی، وەزیری دارایی عێراق بۆ خەرجكردنی مووچەی مانگی 10 هەیبوون، سەرجەمیان جێبەجێ کراون.