بەهۆی کێشەی تەکنیکی چەکی پارەی جووتیارانی سلێمانی بۆ بەغدا گەڕێنرایەوە

ئاڤا نیوز

کێشەی تەکنیکی لە چەکی پارەی جووتیارانی سنووری سلێمانی و هەڵەبجە هەیە، بەڕێوەبەری بازرگانی دانەوێڵەی سلێمانی لەوبارەوە دەڵێت: چەکەکان گەڕێنراونەتەوە بەغدا و بڕیارە ئەمڕۆ چارەسەر بکرێت.

چیرۆکی سەرەکی: بەغدا چەکی پارەی جووتیارانی سنووری سلێمانی و هەڵەبجەی ناردووە، دەرکەوت کێشە لە چەکی پارەکەدا هەیە، بەوهۆیەشەوە ڕەوانەی بەغدا کراوەتەوە.

لێدوانی فەرمی: نەسرین ئەحمەد، بەڕێوەبەری بازرگانی دانەوێلەی سلێمانی بە ئاڤای ڕاگەیاند: کاتژمێر 11:00ـی پێشنیوەڕۆی ڕۆژی یەکشەممە، بەهۆی بوونی کێشەی تەکنیکی لە چەکی پارەی جووتیاراندا، چەکەکان بۆ بەغدا گەڕێندرانەوە.

بەڕێوەبەری بازرگانی دانەوێلەی سلێمانی وتی: چاوەڕوانین ئەمڕۆ دووشەممە کێشەکە چارەسەر بکرێت، هەروەها دەبێت بەغدا پارەکە بخاتە سەر هەژماری بانکی هەرێم، دواتر ڕەوانەی بانکی بابان دەکرێت و دەست بە دابەشکردنی پارەکە دەکرێت.

ژمارەکان وادەڵێن: کۆی گشتی پارەی گەنمی جووتیارانی سنووری سلێمانی 120 ملیار دینارە.

ئەوەی پێویستە بیزانیت: بڕیارە ئەمجارە نۆ ملیار و 500 ملیۆن دینار بۆ جووتیارانی سنووری سلێمانی و هەڵەبجە لەلایەن بەغداوە ڕەوانە بکرێت، بەم جۆرەش 80 ملیار دیناری پارەی گەنمی جووتیاران لای بەغدا دەمێنێت.