لەڕێگەی ئاڤاوە 650 هەلی كار ڕادەگەیێنرێت

ئاڤا نیوز

سێ شارەزای ئەزموونداری بواری كڕین و فرۆشتنی خانوو و زەوی، لەڕێگەی ئاڤاوە 650 هەلی كار ڕادەگەیێنن و ئامادەشن سەرجەم ڕێكارە فەرمییەكان بۆ وەرگرتنی مۆڵەتی پیشەییان بۆ تەواو بكەن و ببنە خاوەنی بزنسی خۆیان.

چیرۆكی سەرەكی: لە پەخشی زەنگی بازاڕی ئەمڕۆی ئاڤا میدیا، لە هەولێر 400 هەلی كار و لە سلێمانی 200 و لە دهۆكیش 50 هەلی كار لە كەرتی عەقارات ڕاگەیێنرا، جگە لە شارەزاكردنی خوازیاران بە كاركردن بە شێوازی ئەكادیمیی كڕین و فرۆشتنی زەوی و خانوو.

لێدوانی فەرمی: ئەردەلان عوسمان، سەرۆكی كۆمەڵەی نێوەندگیری و ڕاوێژكاریی خانووبەرە لە سلێمانی، بە ئاڤای ڕاگەیاند، ئامادەن 200 هەلی كار بۆ گەنجانی سلێمانی بڕەخسێنن كە خوازیاری كاركردنن لە بواری خانووبەرە، بەو مەرجەی لەژێر چەترێكی ئەكادیمی و بەشێوەیەكی ڕێك و سەردەمیانە كارمان لەگەڵدا بكەن، ئامادەین خولی ئەكادیمیشیان بۆ ڕێكبخەین بۆ ئەوەی بەشێوەیەكی پرۆفیشناڵ شارەزای کارەکە بن.

لەلایەكی دیكەوە: یوسف چاڵی، شارەزای عەقارات لە هەولێر بە ئاڤای ڕاگەیاند، لە هەولێریش 400 دەرفەتی كار بۆ خوازیاران ڕادەگەیەنین و ئامادەشین هەموو ڕێكارە فەرمییەكانیان بۆ بكەین بۆ ئەوەی مۆڵەتی پیشەیی كاركردن بەدەستبهێنن و بە فەرمی تۆماربكرێن.

لای خۆشیەوە عەبدولعەزیز سەعدون، شارەزای عەقارات لە دهۆك وتی لە پارێزگای دهۆك بەهەمان شێوە گرفتی كەمی كارمەندیی ئەكادیمی بواری عەقاراتمان هەیە و لێرەوە 50 هەلی كار لەو بوارەدا ڕادەگەیەنم.