شاندی ئیمراڵی لەگەڵ وەزیری داد و سەرۆکی پەرلەمانی تورکیا کۆدەبێتەوە

ئاڤا نیوز

دوای کۆبوونەوەیان لەگەڵ پارتە سەرەکییەکانی تورکیا، شاندی ئیمراڵی قۆناغێکی نوێی لە گفتوگۆکان دەستپێکردووە و ئەمڕۆ لەگەڵ وەزیری داد و سەرۆکی پەرلەمانی ئەو وڵاتە کۆبوونەوە.

بۆچی گرنگە: ئەم گەڕەی کۆبوونەوەکان هەنگاوێکی کردەییە بۆ گواستنەوەی گفتوگۆکان لە ئاستی پارتە سیاسییەکانەوە بۆ ناو دامەزراوە فەرمییەکانی دەوڵەت، بە ئامانجی ڕەخساندنی زەمینەسازیی یاسایی بۆ بەرەوپێشبردنی پڕۆسەی ئاشتی لە تورکیا.

-  ئەمڕۆ هەریەک لە پەروین بوڵدان، میدحەت سانجار و فایق ئۆزگور ئەرۆل، وەک ئەندامانی شاندی ئیمراڵی، لەگەڵ یڵماز تونچ، وەزیری دادی تورکیا کۆبوونەوە. کۆبوونەوەکە نزیکەی 1 کاتژمێر و 30 خولەکی خایاند. دوای ئەوە شاندەکە سەردانی نوعمان کورتوڵموش، سەرۆکی پەرلەمانی تورکیایان کرد و لەگەڵیدا کۆبوونەوە.

زانیاریی زیاتر: بەپێی زانیارییەکان، تەوەری سەرەکیی گفتوگۆکان تایبەت بووە بە قۆناغی دووەمی پڕۆسەی ئاشتی، کە تێیدا جەخت لە هەموارکردنەوەی چەند یاسایەکی گرنگ کراوەتەوە، لەوانە: یاسای سزاکان، یاسای جێبەجێکردنی سزاکان و یاسای بەرەنگاربوونەوەی "تیرۆر".

ئەوەی لەبارەیەوە دەگوترێت: ڕۆژنامەی "تەقویم"ی تورکی بڵاویکردووەتەوە، ئەندامانی شاندی ئیمراڵی داوای کۆبوونەوەیەکی دیکەیان لەگەڵ ڕەجەب تەیب ئەردۆغان، سەرۆککۆماری تورکیا کردووە. لەمبارەیەوە پەروین بوڵدان ڕایگەیاند: "دەمانەوێت لە کۆتایی پڕۆسەکەدا لەگەڵ ئەردۆغان کۆببینەوە و دواتریش سەردانی عەبدوڵڵا ئۆجەلان بکەینەوە."