کۆبوونەوەی ئەنجوومەنی وەزیرانی عێراق بەبێ باسکردنی مووچە کۆتایی هات

ئاڤا نیوز

کۆبوونەوەی ئەنجوومەنی وەزیرانی عێراق بەبێ باسکردنی پرسی ناردنی مووچەی مانگەکانی 11 و 12ی مووچەخۆرانی هەرێمی کوردستان کۆتایی هات، بەڵام جەخت لە بەردەوامیی ناردنی مووچە لە ساڵی نوێدا کرایەوە.

زانیاریی بەدەستهاتوو: کەمێک پێش ئێستا کۆبوونەوەی ئەنجوومەنی وەزیرانی عێراق کۆتایی هات. بەپێی زانیارییەکانی ئاڤا ، لە کۆبوونەوەکەدا هیچ باسێک لەبارەی خەرجکردنی مووچە مانگەکانی 11 و 12ی مووچەی فەرمانبەرانی هەرێمی کوردستان نەکراوە.

زانیاریی زیاتر: لە تەوەرێکی دیکەی کۆبوونەوەکەدا، باس لە ناوەڕۆکی سەردانی شاندی دیوانی چاودێریی دارایی عێراق بۆ هەولێر کراوە. ئەنجوومەنی وەزیران پێشوازیی لەو هەماهەنگییە داراییە کردووە کە لە نێوان هەولێر و بەغدا دروستبووە.

ئەوەی پێویستە بیزانیت: حکومەتی عێراق ئاماژەی بەوە کردووە، ئەگەر حکومەتی هەرێمی کوردستان بەم شێوەیەی ئێستا لەسەر پابەندییەکان و هەماهەنگییە داراییەکان بەردەوام بێت، ئەوا پڕۆسەی ناردنی مووچە لە ساڵی نوێدا (2026) بە شێوەیەکی ئاسایی بەردەوام دەبێت