ئاڤای خەڵک؛ حەوزەکانی ماسی لە تەقتەق مەترسی بۆ سەر ژیانی هاونیشتمانیان دروست دەکەن

ئاڤا نیوز

 

لە قەزای تەقتەق، چەند حەوزێکی بەخێوکردنی ماسی بە شێوەی زیادەڕۆیی لە نزیک ڕێگا سەرەکییەکانی ئەو ناوچانە دروستکراوون و بوونەتە مەترسی بۆ شوفێران و هاووڵاتیان.

 

کێشەی سەرەکی: دانیشتووانی گوندەکانی ساتووقەڵا، کانی ڕەش، مخڕس و ژمارەیەک گوندی دیکە، لە ڕێگای ئاڤا داوا دەکەن، چارەسەری گرفتی حەوزەکانی ماسی ئەو ناوچانە بکرێت کە لەسەر ڕێگا سەرەکییەکان درووستکراون، دەشڵێن، ئەو حەوزانە چەند مەترێک لە شەقامە سەرەکییەکان دوورن، هیچ بەربەستێکیش لە نێوان شەقامەکان و حەوزەکاندا نییە و بووتە مەترسی بۆ هاوڵاتیان.

 

بە وتەی دانیشتواننی ئەو گوندانە، ساڵانە ژمارەیەک ئۆتۆمبێل و خەڵکی گەشتیار دەکەونە ناو حەوزەکان، بەتایبەت لە کاتی شەودا، چونکە حەوزەکان چەند مەترێل لە شەقامە سەرەکییەکان نزیکە. 

 

لێدوانی فەرمی: سەباح عوسمان، بەڕێوەبەری کشتوکاڵی تەقتەق بە ئاڤای راگەیاند، بەگوێرەی مەرج و ڕێنماییەکان دەبێت حەوزەکانی ماسی، لە ڕێگا لاوەکییەکان 150 مەتر و لە ڕێگا سەرەکییەکان 200 مەتر دوور بن، ئەگینا بە نایاسایی هەژمار دەکرێن.

 

ئەمەش بزانە: لە سنووری قەزای تەقتەق نزیکەی دوو هەزار حەوزی ماسی هەیە، بەشێکیان بەبێ هەبوونی مۆڵەت درووستکراون.

 

چارەسەر: ئاسۆ مستەفا، قایمقایمی قەزای تەقتەق، قسەی بۆ ئاڤا کرد و وتی: بەدواداچوون دەکەین، هەر حەوزێک بەپێی ڕێنماییەکان درووست نەکرابێت سزای دەدەین.

 

بە قسەی ئاسۆ مستەفا، لە ماوەی ساڵێکدا نزیکەی 30 کەسیان داوەتە دادگا، چونکە بە گوێرەی ڕێنماییەکان کاریان نەکردووە. دەشڵێت، لێپێچینەوە لەگەڵ ئەو کەسانە دەکەین حەوزی ماسییان بە زیادەڕۆ درووست کردووە.