ئامرازێکی نوێ بۆ تەعریب کردنی کەرکووک پەیڕەو دەکرێت

ئاڤا نیوز

 

سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان ئاشکرای کرد، ئامڕازی نوێ بۆ تەعریبکردنی کەرکووک بەکاردەهێنرێت؛ بەشێوەیەک عەرەبەکان لە ناوچە زێدەڕۆکان نیشتەجێ دەکرێن و کاریان پێ دەدرێت.

لێدوانی فەرمی: فەهمی بوورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان بۆ ئاڤا نیوز گوتی: ئێستا ئامڕازی نوێی تەعریب لە کەرکووک پەیڕەو دەکرێت، بەشێوەیەکی نهێنی و بێ ئەوەی هیچ لایەنێک ئاگاداربێت عەرەب لە شارەکانی عێراق دەهێنرێنە کەرکووک و نیشتەجێ دەکرێن.

زانیاریی زیاتر: عەرەبەکان لە شارەکانی دیکەی وەک "نەجەف، کەربەلا، دیالە، واست.. هتد" دێنە کەرکووک و بێ مۆڵەت لە ناوچە زیادەڕۆکان نیشتەجێ دەکرێن.

گۆشەیەکی دیکە: ڕێگریکردن لە کشتوکاڵکردنی جووتیارانی کورد لە گوندەکانی کەرکووک و دەوروبەری و سوتاندنی کێڵگەکانیان و هەڕەشەی بەردەوام، باری ژیانی خەڵکەکەی ناجێگیرکردووە؛ بۆیە پێویستە لایەنە کوردییەکان هەوڵبدەن ڕووبەڕووی ئەم دۆخە ببنەوە، چونکە کەرکووک هێواش هێواش کوردی لێ نامێنێت. فەهمی بوورهان وای گوت.

وێنە گەورەکە: لە ساڵی 2017ـەوە زیاتر لە 92 هەزار عەرەب هاتوونەتە کەرکووک و لەوێ نیشتەجێن، خەڵکی نیشتەجێی کەرکووک لە 10% کەمتر کاریان پێدەدرێت و لە فەرمانگەکان دادەمەزرێن، ئەمەش کۆچی خەڵکی ڕەسەنی کەرکووکی بۆ شارەکانی دیکە لێکەوتووەتەوە.