بۆ یەکەمجار نرخی ئۆنسێک زێڕ 4500 دۆلاری تێپەڕاند

ئاڤا نیوز

لە دوایین مامەڵەکاندا نرخی زێڕ بەشێوەیەکی گەورە بەرزبووەوە و بۆ یەکەمجار هەر ئۆنسێک بەربەستی 4500 دۆلاری شکاند و گەیشتە 4 هەزار و 522 دۆلار. ئەگەرچی دواتر نرخەکە کەمێک دابەزی، بەڵام ئێستا لە دەوروبەری 4 هەزار و 490 دۆلار جێگیرە و مامەڵەی پێوە دەکرێت.

هۆکارە زانراوەکان: ئەم بەرزبوونەوە پێوانەییە پەیوەستە بە بڵاو کردنەوەی داتاکانی گەشەی ئابووریی ئەمریکا، کە پێشبینییەکان بۆ ئەوەی ئەنجوومەنی یەدەگی فیدراڵی لە مانگی یەکی ساڵی داهاتوودا جارێکی دیکە ڕێژەی سوود دابەزێنێت، بەهێزتر کردووە.

هاوکات دۆناڵد ترەمپ، سەرۆکی ئەمریکا لە تۆڕی "تروس سۆشیال" ڕایگەیاندووە کە کەسێک ناکاتە سەرۆکی یەدەگی فیدراڵی ئەگەر پێچەوانەی بۆچوونەکانی ئەو کار بکات؛ ئەمەش وەک ئاماژەیەک بۆ دابەزاندنی زیاتری ڕێژەی سوود لێکدرایەوە و بووە هۆی بەرزکردنەوەی نرخی زێڕ.

زانیاریی زیاتر: هۆکارێکی دیکەی پاڵپشتیکاری نرخەکان، بریتییە لە گرژییە جیۆسیسییەکان، بەتایبەت ناکۆکییەکانی نێوان ئەمریکا و ڤەنزوێلا و مەترسیی هەڵگیرسانی جەنگ.

کاریگەری و لێکەوتەکان: لەسەر ئاستی بازاڕەکانی کوردستان کاریگەریی ئەم بەرزبوونەوەیە دەرکەوتووە، بەجۆرێک نرخی مسقاڵێک زێڕی عەیار 24 ملیۆنێک دیناری تێپەڕاندووە و مسقاڵێک زێڕی عەیار 21ـیش بە 893 هەزار دینار مامەڵەی پێوە دەکرێت.