ئەندامێکی شاندی پارتی: لە ساڵی نوێ گفتوگۆکان لەبارەی پێکهێنانی حکومەت دەستپێدەکەنەوە

ئاڤا نیوز

 

ئەندامێکی شاندی دانوستاندنکاری پارتی جەخت لەوە دەکاتەوە، کە ستراتیژییەتی حوکمڕانی نووسراوەتەوە و چەند بەشێکی کەم ماوە بۆ ئەوەی گفتوگۆ و ڕێککەوتنی لەسەر بکرێت.

 

وێنە گەورەکە: دوای تێپەڕبوونی زیاتر لە ساڵێک بەسەر بەڕێوەچوونی پرۆسەی هەڵبژاردنی پەرلەمانی کوردستان، پارتی دیموکراتی کوردستان وەکو براوەی یەکەم چەندین گەڕی دانوستانی لەگەڵ یەکێتی نیشتمانی کوردستان ئەنجامداوە و هێشتا لەبارەی بەشێکی پۆستە سیادییەکان نەگەیشتوونەتە ڕێککەوتن، دوایین کۆبوونەوەی ئەمساڵیان لە 16-12-2025 بوو، کە بێ ئەنجام تەواوبوو.

 

لێدوانی فەرمی: د. پشتیوان سادق، بەرپرسی مەکتەبی ڕێکخستنی  هەولێری پارتی و ئەندامی شاندی دانوستاندنکاری پارتی، قسەی بۆ میدیاکان کرد و گوتی، "گفتوگۆکانمان هەنگاوی باشی بڕیوە، لەسەر ستراتیژی حکومڕانی ڕێککەوتن کراوە، چەند پرسێکی کەم ماوە گفتوگۆی لەبارەوە بکرێت و ساڵی نوێ گفتوگۆکانمان لەبارەی پێکهێنانی حکومەت دەستپێدەکەینەوە."

ئەمەش بزانە: ڕۆژی سێشەممە بە سەرپەرشتیی بافڵ تاڵەبانی، سەرۆکی یەکێتیی نیشتمانیی کوردستان مەكتەبی سیاسیی ئەو حیزبە لە دەباشان كۆبووەوە و دوای کۆبوونەوەکە لە ڕاگەیێنراوێکدا پێداگریان لەسەر ئەوە کردەوە کە دەرگای گفتوگۆیان بۆ پێکهێنانی کابینەی نوێی حکومەتی هەرێمی کوردستان کراوەیە.