بانکی ناوەندیی سووریا وادەی گۆڕینی دراوی وڵاتەکەی ئاشکرا کرد

ئاڤا نیوز

 

بانکی ناوەندیی سووریا بە مەرسوومێکی فەرمی و بە ئامانجی چەسپاندنی سەروەری دارایی، وادەی گۆڕینی دراوی ئێستای سووریای دیاری کرد. بە پێی مەرسوومەکە مانگی یەکی ساڵی داهاتوو دراوی سووریا دەگۆڕدرێت.

 

هۆکارە زانراوەکان: سووریا هەوڵدەدات سەقامگیریی ئابووریی بەدەستبهێنێتەوە و متمانە بۆ دراوی نیشتمانیی بگەڕێنێتەوە ئەمەش لەڕێگەی چاپکردنی دراوێکی نوێ.

 

ڕاگەیێنراوی فەرمی: بەپێی ڕاگەیێنراوی بەڕێوەبەری بانکی ناوەندیی سووریا: "مەرسومی ژمارە 293 ساڵی 2025 دەرچوو، کە تایبەتە بە دروستبوونی دراوی نوێی سووریا، وادەی دەستپێکردنی گۆڕینی دراوەکە دەکەوێتە مانگی یەکی 2026، ئەم بڕیارە وەک وەرچەرخانێکی نیشتمانی و ئابووری دەبینرێت، کە تێیدا بانکی ناوەندی دەسەڵاتی تەواوی پێدراوە بۆ ڕێکخستنی پرۆسەی گۆڕینەوەی دراوەکە."

 

 - "دراوی نوێی سووریا هێمای سەروەری دارایی و ناسنامەی قۆناغێکی نوێیە، بە سەرپەرشتیی بانکی ناوەندی بونیاد دەنرێت، ئەمە هەنگاوێکی جێگیرە بەرەو سەقامگیری و بوژانەوەی ئابووریی وڵات."

 

ئەوەی پێشىینی دەکرێت: بڕیارە بانکی ناوەندیی لە ڕێگەی کۆنگرەیەکی ڕۆژنامەوانییەوە وردەکاری و میکانیزمی گۆڕینەوەکە بە ڕوونی بۆ هاووڵاتییان ڕابگەیەنێت و هەروەها بانکەکە لە ڕۆژانی 25 تا 27ی کانوونی یەکەم بەردەوام دەبێت لە کارکردن بۆ تەواوکردنی ئامادەکارییەکان.