پشتیوان سادق: لە ساڵی نوێدا گفتوگۆكان بۆ پێكهێنانی كابینەی نوێ دەستپێدەكەینەوە

ئاڤا نیوز

ئەندامێکی مەکتەبی سیاسیی پارتی ڕایدەگەیێنێت، لەگەڵ یەکێتی لەسەر ستراتیژییەت و دیدگای حکومڕانی گەیشتوونەتە ڕێککەوتن و لە ساڵی نوێدا گفتوگۆکان بۆ پێکهێنانی کابینەی نوێی حکومەت دەستپێدەکەنەوە.

چیرۆکی سەرەکی: ئێوارەی ئەمڕۆ هەینی، بە نوێنەرایەتیی سەرۆکوەزیران مەسرور بارزانی، پشتیوان سادق، وەزیری ئەوقاف و کاروباری ئایینی، بە یاوەریی پارێزگاری هەولێر، بە مەبەستی پیرۆزبایی جەژنی لەدایکبوونی حەزرەتی مەسیح سەردانی کەنیسەی "مارت شەمونی"یان لە شارۆچکەی عەنکاوە کرد و لەلایەن پاتریارک مارئاوا و ژمارەیەک لە پیاوانی ئایینییەوە پێشوازییان لێ کرا.

لێدوانی فەرمی: پشتیوان سادق لە کۆنفرانسێکی ڕۆژنامەوانیدا ڕایگەیاند: "ئەو پێکەوەژیانەی لە هەرێمی کوردستاندا هەیە، نموونەیەکی باڵایە لەسەر ئاستی ڕۆژهەڵاتی ناوەڕاست؛ عەنکاوەش ئێستا گەورەترین شارۆچکەی کریستیاننشینە لە تەواوی ناوچەکەدا".

لە گۆشەیەکی دیکەوە: پشتیوان سادق کە هاوکات ئەندامی مەکتەبی سیاسیی پارتی دیموکراتی کوردستانە، لەبارەی پێکهێنانی حکومەتی هەرێمی کوردستان و حکومەتی فیدراڵ وتی: "لە ساڵی نوێدا گفتوگۆکانمان بۆ ئەو پرسە دەستپێدەکەینەوە؛ لەسەر نووسینەوەی ستراتیژییەت و دیدگای حکومڕانی لە هەرێمی کوردستان گەیشتووینەتە ڕێککەوتن، ئەوەی ماوەتەوە تەنیا هەندێک وردەکارین کە هیوادارین لە ئاییندەیەکی نزیکدا چارەسەر بکرێن".