لەماوەی دوو ساڵدا نزیکەی 89 هەزار پارچە زەوی لە پارێزگا و ئیدارە سەربەخۆکان دابەشکراون

ئاڤا نیوز

پرۆسەی دابەشکردنی زەوی بەردەوامی هەیە، لەماوەی کەمتر لە دوو ساڵدا نزیکەی 89 هەزار پارچە زەوی لە پارێزگا و ئیدارە سەربەخۆکان دابەش کراون.

بەدواداچوونی ئاڤا: بەگوێرەی ئەو بەدواداچوونەی ئاڤا کردوویەتی و داتای لە هەموو شارەوانییەکان وەرگرتووە، لە پارێزگاکانی هەرێمی کوردستان و ئیدارە سەربەخۆکان دابەشکردنی زەوی بەردەوامی هەیە، تا ئێستا زۆرترین زەوی لە پارێزگای هەولێر بەسەر فەرمانبەرانی مەدەنی و سەربازی دابەشکراوە، بەجۆرێک لە پارێزگای هەولێر 60 هەزار فەرمانبەر لە وەرگرتنی زەوی سوودمەند بوون. بە کۆی گشتیش 88 هەزار و 765 فەرمانبەر زەوییان وەرگرتووە.

ژمارەکان وا دەڵێن: هەنگاوەکانی دابەشکردنی زەوی بەسەر فەرمانبەران لەسنووری سەرجەم شارەوانییەکانی هەرێمی کوردستان، بەمشێوەی خوارەوەیە:

•    لە سنووری پارێزگای هەولێر، 60 هەزار پارچە زەوی بەسەر فەرمانبەران دابەشکراوە.
•    لە سنووری پارێزگای دهۆک، چوار هەزار و 18 پارچە زەوی دابەشکراوە.
•    لە سنووری پارێزگای سلێمانی، نزیکەی 20 هەزار پارچە زەوی دابەشکراوە.
•    لە ئیدارەی سەربەخۆی زاخۆ،  چوار هەزار و 747 پارچە زەوی دابەشکراوە.
•    تا ئێستا لە پارێزگای هەڵەبجە و ئیدارە سەربەخۆکانی سۆران، ڕاپەڕین و گەرمیان هیچ پارچە زەوییەک دابەش نەکراوە، بەڵام ئامادەکاری بۆ پرۆسەکە کراوە لەڕووی تۆمارکردنی ناوی فەرمانبەران و کۆکردنەوەی زانیاری و تەرخانکردنی پارچە زەوییەکان و دیزاینکردنەوە.

باکگراوند: دوای تێپەڕبوونی 15 ساڵ لە وەستانی پرۆسەی دابەشکردنی زەوی بەسەر فەرمانبەران، ڕۆژی 27-3-2024 سەرۆکوەزیران مەسرور بارزانی بڕیاریدا، دەستبکرێت بە دابەشکردنی زەوی بەسەر هەموو ئەو فەرمانبەرانەی کە سوودمەند نەبوونە لە وەرگرتنی زەوی، بڕیارەکە هەردوو ڕاژەی سەربازی و مەدەنیی گرتەوە، لەم چوارچێوەیەشدا وەزارەتی شارەوانی دەستی بە ڕێکارەکان کرد، تا ئێستا چەندین قۆناغی دابەشکردنی پارچە زەوی ڕاگەیێنراوە.