لە ڕووداوێکی هاتووچۆدا کەسێک گیانی لەدەستدا و هەشتی دیکەش برینداربوون

ئاڤا نیوز

کاتژمێر چواری دوای نیوەڕۆی ئەمڕۆ هەینی، نۆ کەس بەمەبەستی گەشتیاری ناو بەفر دەچنە ڕێگای مەرزی کێلێ لە قەزای پشدەر لە ئیدارەی ڕاپەڕین، بەڵام ئۆتۆمبێلەکەیان وەردەگەڕێت و بەهۆیەوە شۆفێرەکە گیانی لەدەستدا و هەشتی دیکەش برینداربوون، برینی بەشێکیان قورسە لەناویاندا ژن و منداڵ هەیە، هەموویان کەس و کاری یەکترن.

لێدوانی فەرمی: عەلی عەبدوڵڵا، گوتەبێژی پۆلیسی هاتووچۆی ڕاپەڕین بە ئاڤای ڕاگەیاند: ئۆتۆمبیلەکە لەجۆری تۆیۆتا هایلۆکس بووە کۆنترۆڵی لەدەستداوە و کەوتووەتە ناو دۆڵێکەوە، بەهۆیەوە شۆفێرەکەی گیانی لەدەستداوە و هەشت سەرنشینیش برینداربوون، بریندارەکان ڕەوانەی نەخۆشخانەی گشتیی شەهیدانی قەڵادزێ کراون، باسی لەوەشکرد لەنێو بریندارەکان  دوومنداڵ و دوو ئافرەت هەن، لەبەر سەختی برینەکانیان ڕەوانەی نەخۆشخانەکانی سلێمانی کراون.

ئەمەش بزانە: ئەم ناوچەیەی ڕووداوەکەی لێ روویداوە، ڕێگایەکی پێچاو پێچ و شاخاوییە و نزیک لە پاسەوانی سنوورە و ڕێگایەکی بازرگانی و گەشتیاری نێوان هەرێمی کوردستان و ئێرانە، ڕێگاکە بەربەستی سەلامەتی  بۆ نەکراوە.