بانکی ناوەندیی سووریا: دراوی نوێ بەهای ناگۆڕێت و هەڵاوسان زیاد ناکات

ئاڤا نیوز

 

بەڕێوەبەری بانکی ناوەندیی سووریا دووپاتی دەکاتەوە، پرۆسەی دەرکردنی دراوی نوێ "ڕێکارێکی ڕێکخستنە" و ئامانجی سەرەکی ئاسانکردنی مامەڵەکانە بە لیرەی سووری، جەختی لەوە کردەوە کە بەهاکەی گۆڕانکاری بەسەردا نایەت و نابێتە هۆی زیادبوونی هەڵاوسان.

 

چیرۆکی سەرەکی: ڕۆژی 2025-12-25، بانکی ناوەندیی سووریا بە مەرسوومێکی فەرمی و بە ئامانجی چەسپاندنی سەروەریی دارایی، وادەی گۆڕینی دراوی ئێستای سووریای دیاری کرد. بە پێی مەرسوومەکە مانگی یەکی ساڵی داهاتوو دراوی سووریا دەگۆڕدرێت.

 

لێدوانی ڕۆژنامەوانی: عەبدولقادر حەسریە، سەرۆکی بانکی ناوەندیی سووریا لە چاوپێکەوتنێکدا لەگەڵ "تەلەفزیۆنی سووریا" ڕوونی کردەوە، پرۆسەی گۆڕینەکە "بەشێوەیەکی ئاسان و ڕێک و پێک" بەڕێوەدەچێت و دڵنیایی دا لەوەی هیچ کاریگەرییەکی خراپی لەسەر هەڵاوسان نابێت. ئاماژەی بەوەشدا، بانکی ناوەندیی "لە ماوەی ڕابردوودا سەقامگیری لە نرخی دراودا بەدەستهێناوە" و دراوە نوێیەکەش "نابێتە هۆی زیادبوونی خستنەڕووی نەختینەیی."

 

ئەوەی پێویستە بیزانیت: حەسریە ئاماژەی بەوە کرد کە پلانی کشانەوەی دراوە کۆنەکە دوای تەواوبوونی پرۆسەی گۆڕینەوە دەست پێ دەکات و ماوەی سێ مانگ دەخایەنێت، لەگەڵ ئەگەری درێژکردنەوەی ماوەکە. هەروەها دڵنیایی دا کە گۆڕینەوەکە لە هەموو پارێزگاکانی سووریا هاوکات دەبێت.