کێشەی پارەی جووتیارانی سلێمانی و هەڵەبجە چارەسەر دەکرێت

ئاڤا نیوز

چەکی پارەی گەنمی جووتیارانی سنووری سلێمانی و هەڵەبجە گەیشتووە، بەڵام بەهۆی پشوو خەرجکردنی دەکەوێتە هەفتەی داهاتوو.

چیرۆکی سەرەکی: هەفتەی ڕابردوو شایستە داراییەکانی جووتیارانی سنووری هەولێر و دهۆک دابەشکرا، بەڵام چەکی جووتیارانی سلێمانی و هەڵەبجە نەنێردرابوو، ئێستا چارەسەر کراوە و هەفتەی داهاتوو شایستە داراییەکانیان وەردەگرن.

لێدوانی فەرمی: نەسرین ئەحمەد، بەڕێوەبەری سایلۆکانی سلێمانی؛ بە ئاڤای ڕاگەیاند، "چەکەکان گەڕێنراونەتەوە، بەڵام بەهۆی پشووی سەری ساڵ دەوامی بانکەکان نییە، بۆیە خەرجکردنی شایستە داراییەکانی جووتیارانی سلێمانی و هەڵەبجە دەکەوێتە یەکشەممەی هەفتەی داهاتوو."

ئەمەش بزانە: پشكی جووتیارانی سلێمانی و هەڵەبجە نۆ ملیار و 500 ملیۆن دینارە، ئەوانەی لە یەک تۆن تاوەکو 500 تۆنیان ڕادەستی سایلۆکان کردووە، چەکی بانکیان پێدەدرێت و شایستە داراییەکانیان وەردەگرن.