كۆنسوڵخانەی هۆڵەندا لە هەولێر دانەخراوە

ئاڤا نیوز

کۆنسوڵخانەی هۆڵەندا بۆ ماوەی ڕۆژێک لە هەولێر كارەكانی ڕادەگرێت، ئەوەش وەک ڕێکارێکی خۆپارێزی، کۆنسوڵی هۆڵەندا لە هەولێر دەڵێت "بەهۆی نائارامی هەولێر نییە بەڵکو تەنیا خۆپارێزییە".

 
وێنە گەورەکە: بەرپرسانی ئەمریکا، پێشبینی دەکەن، لە نزیکترین کاتدا ئێران وەڵامی هێرشەکەی ئیسرائیل بۆ سەر کۆنسوڵخانەکەی لە دیمەشق بداتەوە.

زانیاریی بەدەستهاتوو: یاکۆ بریندز، کۆنسوڵی گشتیی هۆڵەندا لە هەرێمی کوردستان بە کوردستان حەسەن پەیامنێری دیپلۆماسی ئاڤا نیوزی گوت: تەنیا بۆ ڕۆژی یەکشەممه 14-4-2024، کونسوڵخانەکە كارەكانی ڕادەگرێت و دووشەممە دەوام ئاسایی دەبێتەوە، ئەم هەنگاوەش وەک ڕێکارێکی خۆپارێزییە.

زانیاريی زیاتر: کۆنسوڵی گشتیی هۆڵەندا لە هەرێمی کوردستان، ڕەتیکردەوە ڕاگرتنی كارەكانی  کۆنسوڵخانەکەیان بەهۆی نائارامی هەولێرەوە بێت، بەڵکو گوتی " تەنیا وەک ڕێکارێکی خۆپارێزییە".

لەلایەکی دیکەوە: وەزارەتی دەرەوەی هۆڵەندا ڕایگەیاند: باڵوێزخانەکەی خۆیان له تاران دادەخەن، ئەمەش بەهۆی پەرەسەندنی گرژییەکانی نێوان ئێران و ئیسرائیل، پێشنیازیان کردووە کە هاووڵاتیانی وڵاتەکەی گەشتەکانیان بۆ ئیسرائیل دوابخەن.

ئەوەی پێویستە بیزانیت: بەهۆی گرژییەکانی ئیسرائیل و ئێرانەوە هەریەک لە هیندستان، نەمسا، ئەڵمانیا و فەرەنسا، داوایان لە هاووڵاتیانی خۆیان کردووە گەشت بۆ ئێران نەکەن، ئوسوترالیاش گەشتەکانی بۆ ئەو وڵاتە ڕاگرتووە.