بڕیاری لێخۆشبوونی پێشینەیەک چووە بواری جێبەجێکردنەوە

 ئاڤا نیوز

وەزارەتی دارایی و ئابووریی حکومەتی هەرێمی کوردستان، پاڵپشت بە نووسراوی ئەنجوومەنی وەزیران، بڕیاریدا سەرجەم پێشینە کشتوکاڵییەکان، کە لەسەر شەهیدان پاکتاو دەکرێن و لێخۆشبوونیان بۆ دەکرێت.

لێدوانی فەرمی: بڕیارەکە كەسوكاری شەهیدانی سەنگەری بەرەکانی شەڕی داعش، پێشمەرگە، هێزەکانی ئاسایشی ناوخۆ، هاووڵاتییانی خۆبەخش و فەرمانبەرانی شارستانی دەگرێتەوە. مەولوود سابیر، بەڕێوەبەری بانکە بازرگانییەکان وای ئاڤا نیوز گوت.

بۆچی گرنگە: له ڕۆژی 2-12- 2024، لە چوارچێوەی گرنگیدانی زیاتر بە کەسوکاری شەهیدان، سەرۆکوەزیران بارزانی بڕیاری دا بە لێخۆشبوون لە شەهیدانی شەڕی داعش لە سەرجەم پێشینە کشتوکاڵییەکان، هاوشێوەی پێشینەکانی دیکە کە لە ئەستۆی خانەوادەی شەهیدانی شەڕی داعش دایە.

ئەوەی پێویستە بیزانیت: پێشینەی قەرزی کشتوکاڵی لەنێوان 80 ملیۆن تا 500 ملیۆن دینارە.

ژمارەکان وادەڵێن: بەپێی ئامارەکانی وەزارەتی پێشمەرگەی حکومەتی هەرێمی کوردستان، لە شەڕی دژ بە داعش، هەزار و 686 پێشمەرگە شەهید بوون.