چارەنووسی شاسوار عەبدولواحید بەدیار 70 سکاڵای یاساییەوە

ئاڤا نیوز

 

سەرەڕای تەواوبوونی ماوەی سزا پێنج مانگییەکەی، شاسوار عەبدولواحید، سەرۆکی جووڵانەوەی نەوەی نوێ ئازاد نەکرا، بەهۆی جوڵاندنی دوو سکاڵا کە پێشتر لەسەری تۆمارکرابوون، ماوەی ڕاگرتنەکەی تاوەکو 12-1-2026 درێژکرایەوە.

 

چیرۆکی سەرەکی: دۆسیەی یاسایی شاسوار عەبدولواحید ئاڵۆزیی زیاتری تێکەوتووە، لە کاتێکدا میدیای فەرمیی جووڵانەوەکە چاوەڕوانی ئازادکردنیان دەکرد، دەرکەوتنی زنجیرەیەک سکاڵای جیاواز لە چەند دادگایەک (سلێمانی و کۆیە)، وای کردووە سەرۆکی نەوەی نوێ وەک "دەستگیرکراو" لە زینداندا بمێنێتەوە.

 

پێدراوە یاساییەکان: ڕۆی 12-8-2025 لەسەر سکاڵای شادی نەوزاد، پەرلەمانتاری پێشووی نەوەی نوێ، شاسوار عەبدولواحید لە ماڵەکەی خۆی لە شاری سلێمانی دەستگیرکرا و ڕۆژی 2-9-2025 دادگای سلێمانی سزای زیندانییکردنی پێنج مانگی بەسەردا سەپاند، ئەو سزایە لە ڕۆژی 29-12-2025 تەواو بوو، بەڵام ئازاد نەکرا، بەهۆی ئەوەی سکاڵای دیکەی لەسەر تۆمارکرابوو.

 

لێدوانی فەرمی: حاکم سەڵاح، وتەبێژی دادگای سلێمانی بە ئاڤا میدیای ڕاگەیاند: "داواکارییەکان لەسەر شاسوار عەبدولواحید بڵاون؛ لە دادگای لێکۆڵینەوەی سلێمانی (کەرتەکانی 3 و 8) و چەند دادگایەکی دیکەش سکاڵای لەسەر تۆمار کراوە."

 

کێشەیەکی دیکەی دۆسیەکە: ئاڤا لە سەرچاوەیەکی باڵای نەوەی نوێوە زانیویەتی، پێشتر نزیکەی 70 سکاڵای یاسایی لەسەر شاسوار عەبدولواحید، سەرۆکی جوڵانەوەی نەوەی نوێ تۆمارکراون کە خۆیان لە 11 دۆسیەدا دەبیننەوە و پەڕاویان بۆکراوەتەوە و وتە لە سکاڵاکارەکان وەرگیراوە و دەبێت دادوەر بڕیار لەبارەیانەوە بدات و یەکلاییان بکاتەوە.

 

لێدوانی پارێزەر: بورهان ڕەشید، پارێزەری شاسوار عەبدولواحید: لەبارەی بڕیارەکەی دادگای سلێمانییەوە تەنیا وتی "هیچ زانیارییەکم نییە."

 

زانیاریی زیاتر: میدیای فەرمی نەوەی نوێ باس لەوەدەکات: هەفتەیەکە ماوەی زیندانییەکەی تەواو بووە، بەڵام ئازاد نەکراوە، هەروەها سزادانی سەرۆکەکەیان بە "سیاسیی" وەسف دەکات، بەبێ ئەوەی وردەکاریی زیاتر لەبارەی سکاڵا یاساییەکان بخەنەڕوو.

 

بەدواداچوونی تایبەت: بەپێی بەدواداچوونی تایبەتی ئاڤا میدیا، ڕۆژی چوارشەممەی ڕابردوو 31-12-2025 شاسوار عەبدولواحید لە فەرمانگەی چاکسازیی گەورانی سلێمانیی کە سەر بە وەزارەتی کار و کاروباری کۆمەڵایەتییە، نێردراوە بۆ فەرمانگەی گرتن و گواستنەوە کە ناسراوە بە تەسفیراتی سلێمانی و ئێستا لەوێ "ڕاگیراوە".

 

ئەوەی پێویستە بیزانیت: شاسوار عەبدولواحدی دوو سکاڵای دیکە لەسەر جوڵێنراوە، کە یەکێکیان بە تۆمەتی ناوزڕاندنە و لەلایەن سەرۆکی شارەوانی کۆیە لەسەری تۆمارکراوە و ئەوەی دیکەش بەهۆی سکاڵای "خاوەن پشکەکان"ی شاری یاری چاڤی لاندە، جارێکی دیکە بوونەتەوە بە بنەمای یاسایی بۆ درێژکردنەوەی ماوەی ڕاگرتنی لەلایەن پۆلیسی سلێمانییەوە.