ئێران زیاتر لە 300 درۆن و مووشەکی ئاراستەی ئیسرائیل کردوون

ئاڤا نیوز

ئێران لە هێرشەکەیدا زیاتر لە 300 درۆن و مووشەکی جیاوازی ئاراستەی ئیسرائیل کردوون و بەشێک لە مووشەکەکانیش لە وڵاتی دیکەوە هەڵدراون. 

 

وێنە گەورەکە: دوای کەمتر لە دوو هەفتە لە هێرشەکەی ئیسرائیل بۆ سەر باڵیۆزخانەی ئێران لە دیمەشق، ئێران شەوی ڕابردوو هێرشی تۆڵەی بۆ سەر ئیسرائیل دەستپێکرد و ڕایگەیاند "مافێکی ڕەوای خۆیان" بووە. ئەم هێرشە دەرگای بۆ کردنەوەی ململانێیەکی گەورەتر لە ڕۆژهەڵاتی ناوەڕاست کردووەتەوە.

 

زانیاری بەدەستهاتوو: بەپێی گوتەی دوو بەرپرسی ئیسرائیلی بۆ ڕۆژنامەی نیویۆرک تایمزی ئەمریکی، ئێران لە هێرشەکەدا 185 درۆنی خۆکوژی و 36 مووشەکی کروزی ئاراستەی ئیسرائیل کردوون.

 

زانیاریی زیاتر: جگە لەمانە ئێران 110 مووشەکی ئاسایی (زەوی بۆ زەوی) بەکارهێناون و بەشێکی کەمیشیان لە عێراق و یەمەنەوە ئاراستە کراون.

 

کاریگەر و لێکەوتەکان: ئیسرائیل لە هێرشەکەی ئێران تووڕەیە و هەڕەشەی تۆڵەکردنەوەی کەمەرشکێن دەکات، کابینەی جەنگی ئیسرائیلیش گڵۆپی سەوزی بۆ بنیامین نەتانیاهۆ، هەڵکردووە تا هێرشی تۆڵە دەستپێبکات، هەرچەندە بەرپرسانی ئەمریکا لەم هەنگاوەی ئیسرائیل نیگەرانن.