"ژ دیمەشق و واشنتون بو بارەگایێ بارزانی"

ئاڤا نیوز

 

ل روژا 8ی کانوونا دوویێ 2026ێ سەروک بارزانی دوو پەیوەندیێن تلەفونی یێن جودا گەهشتنێ کو ل زور لایان ڕەنگدانەڤەیا وێ سەنگا سیاسی و ڕولێ ئەقلیمیە کو رێزدار سەروک بارزانی هەیە. پەیوەندیا ئێکێ ژ لایێ ئەحمەد شەرعێ سەروکێ سوریاڤە بووە و پەیوەندیا دوویێێ ژ لایێ تۆم باراک بالیوزێ بەرێ یێ ئەمریکا و دنهادا نێردەیێ تایبەتێ دونالد ترامپێ سەروکێ ئەمریکایە بو کاروبارێ سوریا. ناڤەروکا ڤان هەردوو پەیوەندیان ل دوور روودانێن حەلەبێ بوویە کو هێزێن ڕژێما دیمەشقێ هێرشی دەڤەرێن کوردی ب تایبەتی هەردوو تاخێن ئەشرەفیە و شێخ مەقسوود کریە .

 

ئەوا دڤێ قوناغا هەستیاردا پەیوەندی ب سەروک بارزانی دهێتەکرن رێکەفت نینە بەلکو ب پێچەوانە ئەوێ راستیێ دیار دکەت کو ئەکتەرێن ناوچەیی و نیڤدەوولەتی گەهشتینە وێ قەناعەتێ کو رێزدار سەروک بارزانی ئەو کەسایەتیە کو مینا ناڤەندەکا گرنگا سیاسی سەرکردەیەکێ خودان هەلویست و هێزەکا سەقامگیرکەرە بو کوردان د دەڤەرەکا مینا روژهەلاتا ناڤەراست کو هەر روژ بەرەڤ ئالووزیێن مەزنتر دچیت. ئەڤ هێرشێن ڤان چەند روژێن بوری بو سەر تاخێن کوردنشین ل حەلەبێ پەرەسەندنەکا مەترسیدارە، تاخێن شێخ مەقسوود و ئەشرەفیە ژ مێژە هێمایا هەبوونا کوردان و خو رێکخستن و خۆڕاگریا کوردان بوویە ل حەلەبێ. لێ ب مخابنیڤە ل دەمەکێ کو دیمەشق ل شوینا هەلبژارتنا دیالوگێ رێیا سەربازی هەلبژارتیە، ئەڤە دبیتە زەنگەکا مەترسیدار نەک تنێ بو کوردێن روژئاڤایێ کوردستانێ بەلکو بو هەمی دەڤەرێ کو مەترسیا دروستبوونا دەڤەرەکا نویا شەرەکێ دژوار و خویناوی و رەگەزپەرەستی هەیە. .

 

د بەرامبەر ڤێ پاشخانێدا ئەڤ چەندە روون دبیت کو بوچی ئەحمەد شەرع پەیوەندی ب سەروک بارزانی کریە. ئەڤە دانپێدانەکا راستەووخویە کو سەروک بارزانی بتنێ سەرکردەیێ کوردێن باشوور نینە، بەلکو رێبەرێ نەتەوەیی یێ هەر چوار پارچەیێن کوردستانێ یە و دیمەشق گەهشتیە وێ قەناعەتێ و دزانیت کو سەروک بارزانی شەرعیەت و کاریگەری و باندوور ل سەر هەمی هێز و لایەنێن کوردی هەیە. د پەیوەندیا تۆم باراک ئەڤ وێنەیە زێدەتر بهێز دبیت، بەرژەوەندیێن ئەمریکا بو سەقامگیری ل باکوورێ سوریا تشەکێ دیار و روونە و ئەمریکا ل وێ چەندێ گەهشتیە کو رووبروبونێن سەربازینابیتە بناغەیێ ئاشتیەکا درێژ خایەن ل سوریا. لەورا پەیوەندیا ئەمریکا ب سەروک بارزانی وێ چەندێ دیار دکەت کو واشنتون سەروک بارزانی وەکو کەسایەتیەکێ گرنگ و ب باندوورێ دەڤەرێ د کێمکرنا گڕژیان و ڤەکرنا وان کەنالێن دیپلوماسی دناڤبەرا وان لایەنان دهێتە دیتن کو ب پێچەوانە کارەکێ بزەحمەتە. هێز و سەنگا سەروک بارزانی ب هویری د تێکەلکرنا دیپلوماسی و سیاسەتەکا پراگماتیکی دایە. سەروک بارزانی د زێدەتر ژ نیڤ سەدەی د گورەپانا سیاسیدا هەردەم لایەنگرێ چارەسەریا پرسگرێکان ب رێیا دیالوگێ بوویە نەک شەڕ لێ بو پاراستنا.

 

ئەڤا نها دیمەشقێ و واشنتون پەیوەندی و گازیا وان تاکو "سەرێ بلند" هاتیە دەرخەرێ وێ چەندێ یە کو ڕولێ هەرێما کوردستانێ ب گشتی و رێزدار سەروک بارزانی ب تایبەتی د سەقامگیریا دەڤەرێ بەرەڤ ئاستەکێ بلند چوویە و دنهادا هەرێما کوردستانێ وەکو ناڤەندەک بو گوفتگوو و نێوەندگەری و بەرپرسیارەتی بهێتە دیتن د پێچەوانەی زوربەیان دەڤەرێن دیێن روژهەلاتا ناڤەراست کو هەر روژ بەرەڤ ئالووزیێن نوو دچن. لەورا هەردوو پەیوەندیێن ۸ێ کانوونا دوویێ زێدەترن ژ پەیوەندیەکا دیپلوماسی. ئەڤە دانپێدانەکا راستەوخوو و پەیامەکا رونە بو هەموو لایەنێن دەڤەرێ ژی کو ڕوولێ مژوویی یێ سەروک بارزانی وەک سەرکردەیەکێ نیشتیمانی و بەرگیریکارەکێ کورد دشێت ئەو کەس بیت کو کلیلا دەرگەهێن دیالووگێ بو پرسگرێکێن هەرە ئالووز هەبیت.

 

لێ ئەو چەندە مایە کو بزانین رەوشا ئالووزا حەلەبێ دێ بەرەڤ کیڤە چیت د دەمەکێدا کو هەمی هیڤی لسەو وێ چەندێ بوون کو پشتی ژ ناڤچوونا ڕژێما ئەسەد ئاشتی و ئێکدوو قەبیلکرنا نەتەوەیی و ئایینی ل سوریا بەربەلاڤبیت لێ ب مخابنیڤە لسەر ئەرد ئەو تشتە ناهێتە دیتن، لێ گومان تێدا نینە کود پرسا کوردێن روژئاڤا و پاراستنا سەرومالێن وان رێزدار سەروک بارزانی د هەمی ئاست و رەوشەکێدا دێ بیتە ئەو قەلغانا پێویست ژ بو کوردێن روژئاڤا و پارچەیێن دیێن کوردستانێ.