سەرۆک بارزانی لە یادی ئەنفال: هێشتا دەنگ و ڕەنگی شۆڤێنی بۆ دژایەتیكردنی كورد لەناو دەوڵەتی عێراقدا دەبینرێت

ئاڤا نیوز

 

سەرۆک بارزانی لە یادی ئەنفالدا پەیامێکی بڵاوکردووەتەوە و دەڵێت، هێشتا دەنگ و ڕەنگی شۆڤێنی بۆ دژایەتیكردنی كورد لەناو دەوڵەتی عێراقدا دەبینرێت.

 

چیرۆکی سەرەکی: ئەمڕۆ 36 ساڵ بەسەر جینۆسایدی هەرێمی كوردستان تێدەپەڕێت، لە پرۆسەیەكی لە ناوبردن و ڕاگواستن كە ڕژێمی بەعس کردوویەتی، بەشێوەیەک هێشتا كاریگەرییەكانی وەک زامێكی قووڵ لە جەستەی كۆمەڵگەی کوردیدا ماوە.

 

پەیامی فەرمی: سەرۆک بارزانی بۆ یادی 36 ساڵەی جینۆسایدی كوردستان گوتی: لەو كۆمەڵكوژی و جینۆسایدەدا كە لە چەند قۆناغ و بەشێوەیەكی ڕێكخراو سەرجەم ناوچەكانی كوردستانی گرتەوە، 180 هەزار هاووڵاتی بێتاوانی كوردستان بێسەروشوێن و شەهید كران؛ لەگەڵ ئەوەشدا كیمیابارانكردنی كوردستان و وێرانكردنی هەزاران گوند و پلانی تەعریبکردن و ڕاگواستنی زۆرەملێ و تێكدانی ژێرخانی ئابووری و دیموگرافی و كۆمەڵایەتی و دەروونی كوردستان بەشێكی دیکە ئەو تاوانانە بوون.

 

ئەوەی پێویستە بیزانیت: سەرۆک بارزانی لە پەیامەکەیدا دەڵێت: ڕاستە ئەنجامدەرانی تاوانی ئەنفال و تاوانەكانی دیکە تووشی شكست بوون و كەوتنە زبڵدانی مێژوو، بەڵام ئاسەواری ئەو جینۆساید و زوڵمەی لە دژی گەلەكەمان ئەنجام دران هەر ماون و برینەكانی گەلەكەمان ساڕێژ نەكراون؛ سەرباری ئەو ستەمە گەورەیەی لە گەلەكەمان كراوە بەداخەوە هێشتا دەنگ و ڕەنگی شۆڤێنی بۆ دژایەتیكردنی كورد لەناو دەوڵەتی عێراقدا دەبیندرێت.

 

لەلایەکی دیکەوە: سەرۆک بارزانی لە پەیامەکەیدا جەختی کردەوە، ئەركی سەرشانی دامەزراوە فەرمییەكانی دەوڵەتی عێراقە كە کار بۆ قەرەبووی ئەنفال و ئەو جینۆساید و زوڵمە بكەن كە لە بەرامبەر گەلی كوردستاندا ئەنجام دراوە، پێویستە ڕێگە لە هەموو جۆرە هەوڵ و سیاسەتێكی شووم بگرن كە بە دیدێكی شۆڤینی و نكۆڵیكار سەیری مافەكانی گەلی كوردستان دەكەن؛ لە یادی 36 ساڵەی تاوانی ئەنفالدا پێزانینمان بۆ قوربانیدان و خۆڕاگریی كەسوكاری ئەنفال و شەهیدان هەیە و سڵاو لە گیانی پاكی شەهیدانی ئەنفال و هەموو شەهیدانی ڕێگەی ئازادیی كوردستان.