لە بەغدا نۆ چەکدار هێرش دەکەنە سەر وێستگەیەکی سووتەمەنی و دەستگیر دەکرێن

ئاڤا نیوز

 

هێزێکی پۆلیسی فیدراڵیی عێراق نۆ چەکداریان لە ناوچەی شەعبی ڕۆژهەڵاتی بەغدا دەستگیر کرد، کە بە شێوەیەکی تووند هێرشیان کردبووە سەر کارمەندێکی وێستگەی سووتەمەنی و بانگەشەی ئەوەیان دەکرد سەر بە گرووپی "سەرایا سەلام" بن.

چیرۆکی سەرەکی: کاتژمێر 11:30 خولەکی شەوی ڕابردوو چەند ئەندامێکی هێزەکانی سەرایا سەلام لە ناوچەی شەعبی بەغدا چوونەتە بەنزیخانەیەک بەمەبەستی کڕینی بەنزین بۆ ئۆتۆمبێلەکانیان لەکاتێکدا بەنزینخانەکە لەو کاتەدا داخراوە، بەڵام ئەوان داوای بەنزینیان کردووە، بەوهۆیەش لەگەڵ پاسەوانەکانی بەنزینخانەکە بووەتە دەمەقاڵێیان، دواتریش هێزێکی دیکەی سەرایا سەلام چوونەتە بەنزینخانەکە، کۆکردنەوەی ئەم هەموو هێزەش وایکردووە هێزەکانی پۆلیسی فیدڕاڵی دەستوەردان بکەن.

ڕاگەیێنراوی فەرمی: وەزارەتی ناوخۆی عێراق لە ڕاگەیێنراوێکدا دەڵێت: "هێزە ئەمنییەکان دەستبەجێ دوای وەرگرتنی زانیاری لەسەر ڕووداوەکە گەیشتوونەتە شوێنەکە، هەرچەندە تۆمەتبارەکان ڕووبەڕووی هێزەکان بوونەتەوە و تەقەوێژی دروستبووە، بەڵام دواجار هەر نۆ چەکدارەکە قۆڵبەست کران."

٠ ئێستا لێکۆڵینەوەی ورد بۆ زانینی پاڵنەر و وردەکارییەکانی ئەم هێرشە دەستیپێکردووە و تۆمەتبارەکان ڕەوانەی لایەنە دادوەرییەکان کراون تاوەکو بەپێی یاسا سزا بدرێن.

٠ دەزگا ئەمنییەکان جەخت لە چەسپاندنی یاسا و پاراستنی سەلامەتیی هاووڵاتییان دەکەنەوە،  ڕێگا نادەن هیچ کەس و گرووپێک ئارامیی پایتەخت تێک بدات. 

کاردانەوەکان: هێزی سەرایا سەلام، سەر بە موقتەدا سەدر، ئەم بەیانییە نوسراوێکی فەرمی خۆی بڵاوکردەوە و ڕایگەیاند، بڕیاردرا 'محەمەد جاسم سوودانی' لە فەوجی دوو-لیوای سێ- فیرقەی یەکی هێزەکانیان لە ڕیزەکانی سەرایا سەلام دەربکرێت.

زانیاریی زیاتر: وەزارەتی ناوخۆی عێراق، هۆشداری دەدات کە بە توندی مامەڵە لەگەڵ هەر جۆرە تێپەڕاندنێک دەکەن کە زیان بە ئاسایشی گشتی بگەیەنێت، ئەمەش وەک هەوڵێک بۆ ڕێگریکردن لە هەر جۆرە سەرپێچییەک کە بە ناوی گرووپە چەکدارەکانەوە لە دژی خەڵکی مەدەنی و کارمەندانی دامەزراوە خزمەتگوزارییەکان ئەنجام بدرێت.