ترەمپ پێناسی گومرگی بەسەر ئەو وڵاتانە سەپاند کە دژی ئەوەن ئەمریکا دەست بەسەر گرینلاند بگرێت

ئاڤا نیوز

 

دۆناڵد ترەمپ، سەرۆکی ئەمریکا زنجیرەیەک پێناسی گومرگی بەسەر ژمارەیەک وڵاتی هاوپەیمانی خۆیدا سەپاند کە وەک خۆی دەڵێت "دژی ئەوەن ئەمریکا دەست بەسەر دوورگەی گرینلاند بگرێت."

 

وێنە گەورەکە: دۆناڵد ترەمپ بەردەوام پێداگری لەسەر بەدەستهێنانی گرینلاند دەکاتەوە. ئەو پێی وایە بۆ ئاسایشی نیشتمانیی ئەمریکا گرنگە. چەند جارێکیش گوتویەتی: ئەگەر ئەمریکا گرینلاد نەخاتە ژێر ڕکێفی خۆی؛ ڕووسیا و چین ئەو کارە دەکەن. هاوکات ڕەتیشی ناکاتەوە کە ئەگەر هەیە بە بەکارهێنانی هێز ئەو دوورگەیە بەدەستبهێنێت. 

 

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند: پێناسی گومرگی لەسەدا 10 لە 1ـی شوباتەوە لەسەر دانیمارک، نەرویج، سوید، فەرەنسا، ئەڵمانیا، بەریتانیا، هۆڵەندا و فینلاند دەچێتە بواری جێبەجێکردنەوە.

- ئەم پێناسە گومرگیانە لە یەکی حوزەیرانی داهاتوو بۆ 25% بەرز دەبنەوە و بەردەوام دەبن تا ئەو کاتەی ڕێککەوتنێک دەکرێت کە ڕێگە بە ئەمریکا دەدات ئەو دوورگەیە بکڕێت.

 

کاردانەوەکان: ئەم بڕیارەی ترەمپ کاردانەوەی وڵاتانی ئەوروپای بەدوای خۆیدا هێنا. کیەر ستارمەر، سەرۆکوەزیرانی بەریتانیا، ئەم هەنگاوەی ترەمپی بە "هەڵە" ناوبرد. ئیمانوێل ماکرۆن، سەرۆکی فەرەنساش بڕیارەکەی ترەمپی بە "قبووڵنەکراو" وەسف کرد.