مامۆستایانی وانەبێژی کورد لە کەرکووک گردبوونەوە

ئاڤا نیوز

ئەمڕۆ مامۆستایانی کورد لە کەرکووک لەبەردەم باڵەخانەی بەڕێوەبەرایەتیی گشتیی پەروەردە گردبوونەوە و داوا دەکەن هاوشێوەی مامۆستایانی نەتەوەکانی دیکە بکرێنە گرێبەست. 

 

چیرۆکی سەرەکی: ئەمڕۆ دووشەممە وەزیری پەروەردەی عێراق سەردانی پارێزگای کەرکووکی کرد، بەمەبەستی بەسەرکردنەوەی چەند قوتابخانەیەکی نۆژەنکراوە؛ بەشێک لە مامۆستایانیش لەبەردەم باڵەخانەی بەڕێوەبەرایەتیی گشتیی پەروەردەی پارێزگاکە گردبوونەوە بەمەبەستی داواکردنی مافەکانیان.

 

لێدوانی فەرمی: مامۆستا جەنگی وریا لە گردبوونەوەکەی ئەمڕۆ بۆ پەیامنێری ئاڤا نیوز گوتی: لە ساڵی 2019ـەوە 17 هەزار گرێبەست بۆ شاری کەرکووک ڕاگەیێنرا، لەو بەشە 12 هەزار مامۆستای عەرەب و سێ هەزار و 800 مامۆستای تورکمان کران بە گرێبەست، بەڵام کورد کە هەزار و 200 مامۆستای هەبوو تاوەکو ئێستا هیچیان گرێبەستیان بۆ نەکراوە و پشتگوێخراون و لەلایەن وەزارەتی پەروەردەی عێراقەوە وەڵامیان نادرێتەوە.